【《蘋果》獨家】王敏德孻仔一拖四Clubbing 未夠秤冇得入
星二代愛夜蒲，足迹遍及中環蘭桂坊，前日凌晨輪到型男王敏德和名模馬詩慧的16歲幼子王躍穎（Kadin）出巡，他巴閉一拖四名性感美少女，但最終因每人200元入場費講價不遂卻步，其實Kadin也未夠秤入夜場，他最終撇甩四女獨自回家，媽咪馬詩慧昨笑爆囝囝：「入唔到，冇得夾硬嚟。」
【前日凌晨 蘭桂坊】
【敗興折返】
■Kadin的其中一位女伴是拍過寶礦力廣告的Audrey，眾人因入場費講價失敗而離開。DV圖片
王敏德和馬詩慧的16歲孻仔王躍穎，最近宣佈與拍拖3個月的女友Mimi甩拖，但卻不愁寂寞，前日凌晨，他一拖四出巡中環蘭桂坊，全黑打扮的Kadin，身邊有4位長髮美少女、8玉腿相伴，位位打扮青春，背心熱褲、超短裙，而其中一位，更是拍過寶礦力水特廣告的模特兒Audrey。
翻兜再失敗
型仔Kadin與四名美少女浩浩蕩蕩到夜場PLAY，由於正值放暑假，現場不少後生仔女等入場，當Kadin等預備入場時，PLAY工作人員要求收取每位200元入場費，四名美少女不想付款，Kadin則沒所謂，一行人在夜場外打個白鴿轉便拉大隊離開。行開不久，有同行女提出翻兜講價入場，工作人員堅持收費，他們失望而回，其實Kadin也未夠歲數進場。
【浩蕩入場】
■馬詩慧的16歲兒子Kadin，前日凌晨偕四名美少女現身老蘭，準備入夜店PLAY夜蒲。
【攬攬走人】
■掃興的Kadin，撇甩同行四女先回家，臨別不忘攬攬。
■Kadin由老蘭行去ifc再搭的士回家。
唔會管仔女五人敗走後站在街頭吹水，Kadin說：「算啦，唔玩，你哋玩！」穿着吊帶黑衫襯白熱褲的少女，似乎對Kadin很嗒糖，捉着他說：「不如轉場玩」Kadin未有動搖拒絕，堅持撇甩四女：「你哋去玩啦，have fun！」他跟該女伴擁抱一下，便獨自行去ifc搭的士返跑馬地寓所。
對於Kadin一拖四夜蒲老蘭，其母馬詩慧昨在電話表示囝囝有備案：「佢有話去老蘭，冇話去club，老蘭唔係全部唔好，都有hang out地方，有正常社交。不過嗰啲地方要18歲先入得，因為有酒牌，佢16歲唔入得。」馬詩慧給予子女很大自由度，她說：「以心比心，我唔會想人哋管住晒，調番轉細路仔更加唔想。」母子關係如朋友：「佢哋都大個，有自己私隱，我會尊重。」
Kadin不夠秤未能夜蒲，馬詩慧爆料：「家姐笑佢多啲，我教佢點解唔開家姐個名，可能畀入。」Kadin知難而退，即使被女伴游說都不為所動，馬詩慧取笑：「唓，可以點？佢都入唔到，冇得夾硬嚟，因為佢知道去第二間都係入唔到！」
採訪、攝影：楊浩賢、陳辰、陳杰
■Kadin曾在Ig公開戀情，但拍拖三個月便閃電分手。資料圖片
■馬詩慧昨受訪時取笑兒子Kadin夜蒲失敗。資料圖片
|
鍾意就快D Share啦！
|
|
|
