梁齊昕同男友 Michael去海洋公園餵海豚，男方輕攬齊昕條腰，好溫馨！
網上圖片
真面目
襯唔襯 為仔停學 男友 Michael大起底 𠝹手齊昕：我欠佢好多
23歲梁齊昕近日人氣同民望，比特首父親梁振英高幾條街，尤其早前接受有線電視訪問的片段出街後，更被網友大讚有烈女風範！
曾經𠝹過手的烈女齊昕不怕死，不過對住男友又係另一回事。本刊發現齊昕 13年開始與大學同學 Michael Fong（方海鍵）拍拖，兩人同在英國倫敦政治經濟學院讀書，男讀經濟女讀法律，十分合襯。齊昕仲曾公開多張拍拖 sweet相，又在 fb留言冧男友，話「佢為我作出好大犧牲，我欠佢好多！」夠唔夠你𠝹手犧牲大？
現年 23歲的特首大女梁齊昕， 10年開始在英國名校倫敦政治經濟學院(LSE)讀法律，但去年突然停學回港，表面上是想停一停諗一諗是否適合做律師，實際上是為了陪伴由英國回港工作的男友。
畢業返港做 trainee
梁齊昕與男友 Michael Fong（方海鍵）是 LSE同學，兩人同樣是 10年入學，但修讀經濟的 Michael比齊昕早 1年畢業，現時已回港工作，今年 1月開始在專做保險及投資等業務的 Principal信安做 trainee。
齊昕曾經講過父母好著重自己朋友的背景同身份，何況是男朋友，由於 Michael現在只是基層員工（唔知有冇$14,000月薪？），所以齊昕未敢高調公開戀情，只在 fb放上拍拖照與朋友分享，擺明博連 fb都唔知係乜的 689睇唔到！
「多謝呢個男人！」
13年齊昕生日， Michael為女友搞 party，又送花又送蛋糕，氹到齊昕勁開心；去年 6月齊昕𠝹手疑似割脈自殘，有傳是當時與 Michael鬧交，一時情緒激動所致。
不過後來兩人和好如初， Michael 9月時繼續同女友慶祝生日，仲頭貼頭合照，齊昕忍唔住公開留言多謝男友，「我要多謝呢個男人，佢為我作出好大犧牲，我欠佢好多！」更一度以兩人合照做 fb的 profile pic，可見齊昕有幾愛 Michael。自稱生活非常平民化的齊昕，拍拖期間會去海洋公園，兩人一齊餵海豚，化了淡妝的齊昕笑得極滿足，與其惹火 smoky eyes潑辣形象有強烈對比，果然在男友面前立即變成小綿羊！
男友疑似黃絲
齊昕早前接受雜誌訪問時，表示自己拍過 2次拖，對方都係香港人，不過暫時未遇到真心鍾意的人。聽落似暗示自己現時單身，不過 Michael的 Instagram profile pic，依然是自己半裸與齊昕度假時影的攬到實合照，似乎兩人仍是情侶。
拍拖 2年感情穩定，但 Michael出身小康，加上疑似是黃絲，在 fb更 follow學聯副秘書長岑敖暉 fan page，雖然齊昕多次強調自己對任何事都抱開放態度，不過唔知 689見到 Michael撐佔中，會唔會唔俾佢入門做女婿呢？
上有線飾物勁誇 Nel Nel撐：唔好吹毛求疵！
齊昕上有線接受訪問，戴到好似結婚咁成手飾物，睇落好浮誇，不過 Nel Nel就覺得好後生，「好多鬼妹仔都鍾意戴到成手嘢，戴好 chunky嘅飾物，而佢條 one-piece又好簡單，成個造型都配搭得唔錯，唔會好古靈精怪！」至於個女鬼 ball后 look（前頁）， Nel Nel就話好老積，「套衫比較成熟，雖然成件事老積咗，但就冇出錯，如果條裙短番少少，成個比例就會啱佢身形多啲！同埋對鞋可以有特色啲，成件事就會 fashion好多！大家唔好對佢咁吹毛求疵，佢畢竟係一個後生女咋！」
|
鍾意就快D Share啦！
|
|
|
