真面目
10年恩怨 吼實阿梅 10周年騷 90歲梅媽：邊個敢出嚟搞
張國榮逝世十周年紀念騷剛完成，有傳哥哥的前經理人陳淑芬借一連串紀念活動賺大錢，袋走近 2千萬。
適逢今年亦是另一巨星梅艷芳逝世十周年，據知阿梅生前一班好友對紀念騷非常有興趣，有意仿效陳淑芬，為悼念阿梅「大搞」紀念活動。搞騷有錢搵，相反阿梅的 90歲母親覃美金連開飯錢都冇，去年 4月更正式破產，現時要靠借錢度日。對於阿梅分分鐘被人借過橋，梅媽週一（ 8日）激動表示：「邊個敢出嚟搞！我即刻登報……」
自梅艷芳 03年 9月公開自己患有子宮頸癌，至 12月 30日在養和醫院因癌細胞擴散至肺部引致心肺缺氧及其他併發症逝世，梅媽與阿梅的大哥梅啟明近 10年內多次就遺產問題告上法庭，至今已使了幾百萬律師費，可惜一直敗訴，兩母子先後破產，梅媽更因欠租被入稟收樓。
冇錢出自傳
剛於週一（ 8日）上庭的梅媽，再次向遺產執行人匯豐國際信託追討每月 12萬生活費。本刊到高等法院找到梅媽，發現梅媽雖然已經 90歲，但對愛女生前點滴依然記得非常清楚。
講起阿梅生前一班徒弟如安仔、何韻詩，梅媽大嘆人情冷暖：「一個電話都冇打過嚟！」而問到阿梅今年逝世十周年會否搞紀念騷，梅媽更即時扯火，「邊個敢出嚟搞，我即刻登報要求佢哋將收入捐咗去，冇人可以借阿梅個名呃錢！我都想親自幫阿梅搞，最衰我冇錢，之前一直想出一本阿梅嘅自傳，但到𠵱家都搞唔成，就係因為冇本錢！」
爆最後遺言
梅媽自稱：「我只係想攞番生活費，其他嘢我唔理！」對於外界盛傳阿梅與家人關係惡劣，因此寧願成立遺產基金管理遺產都唔直接交畀屋企人，梅媽反指被人抹黑。
「阿梅不知幾錫屋企，佢走之前嗰個中秋節返屋企食飯，之後佢叫我上佢屋企，打開書房入面個夾萬畀我睇，話『我遲啲會去美國醫病，去幾耐唔知，但我會每日打畀你，你唔使擔心生活費，你將呢間屋（壽山村豪宅）租出去，啲租夠你生活㗎！呢度有啲珠寶，你鍾意就拎去，留番大呢粒畀我做嫁妝得喇！』點知一直到阿梅走嗰日我先再見到佢！」
徒弟好友逐個數
梅媽大控訴
阿梅死後，梅媽生活即冇曬保障，據梅媽表示，阿梅死前曾承諾會照顧母親一世，除了請工人司機唔使自己出錢，每月更有 6萬 5生活費。不過梅媽對上 10個月一毫子都收唔到，被迫破產，原因係遺產管理人匯豐話基金冇曬錢，要變賣阿梅壽山村豪宅先有錢畀生活費，但又離奇地一直唔肯將物業拍賣！阿梅死了 10年，梅媽就為錢為遺產，奔波足 10年！
街數冇人還
梅媽週一向本刊展示一份會計師樓文件，上面清楚列明阿梅的債仔及拖欠金額，梅媽表示知道阿梅一向疏爽，但唔甘心愛女的血汗錢被呃！
|
鍾意就快D Share啦！
|
|
|