封面
哥哥死後斷交 10年 唐唐情敵 Kenneth後台泯恩仇
不經不覺，哥哥張國榮 03年愚人節給我們開的玩笑，一眨眼 10年。掛念他的人，除了一班各地「哥迷」，還有當年以未忘人身份、在喪禮上寫道「天長地久有時盡此愛綿綿無絕期摯愛唐鶴德輓」的唐唐。
週日（ 31日）哥哥的悼念音樂會上，摯愛唐唐和哥哥前助手 Kenneth（鄭賽龍）都有現身，但卻全晚避過鏡頭，據知二人竟在後台碰上， Kenneth當晚更戴住貴賓證自出自入。
當年有傳是唐唐情敵的 Kenneth，在哥哥離世後，與唐唐斷交 10年再在後台相逢。這 10年間，據知唐唐對哥哥仍甚「專一」，並冇另結新歡，反之肥了一個碼、人到中年的 Kenneth卻流連基網尋同好，更要投靠哥哥生前好友連炎輝，轉撈保險捱世界。
10年前的 4月 1日傍晚 6時 43分，哥哥張國榮在中環的文華酒店，從 24樓一間套房一躍而下，結束 46年的精采人生。最傷心的，肯定是摯愛唐鶴德。
後台撞到正
週日（ 31日），哥哥生前經理人陳淑芬在紅館為哥哥舉行《繼續寵愛•十年》演唱會，當晚哥哥生前好友都紛紛出席，據知唐唐就和 Kenneth於後台碰個正着。「唐唐當時行過後台走廊，同 Kenneth迎面撞到，大家對望咗一下，都有打招呼傾咗幾句，佢哋冇聯絡成 10年啦！」
自從哥哥離世後，據知唐唐和 Kenneth幾近斷交，特別是唐唐，從不會特別提起 Kenneth，「雖然佢哋又冇話反面，不過唐唐呢十年都好少會提到 Kenneth，費事觸景傷情啦！呢段期間大家有咩要聯絡，主要都係靠哥哥生前司機（現仍由唐唐僱用）做傳話。」
轉行撈保險
當年哥哥自殺的原因曾有多個版本，更傳出過與唐唐感情生變。事發後，唐唐曾站出來否認哥哥為情自殺，但自從 02年助手 Kenneth搬入加多利山，與哥哥和唐唐同一屋簷下，感情生變的傳聞已傳個不停。 02年哥哥在《異度空間》的首映禮上開腔講 Kenneth：「佢之前喺 Esprit度做 sales，我去攞衫認識佢，後來我個助手走咗就請佢幫手。」
沙田屋村仔出身、現年 33歲高六呎的 Kenneth，自從哥哥離世後不久便打回原形，雖然哥哥生前都有畀錢 Kenneth使，但不消 5年， Kenneth已使乾使淨。「 Kenneth不嬲都係蒲友，嗰時哥哥走咗，轉個頭佢已經繼續落 bar玩，邊有唐唐咁傷吖！嗰時佢工又唔正經返，冇份工做得長，結果俾佢玩咗幾年玩到山窮水盡，好在有連炎輝（哥哥生前老死、 AIA保險區域總監）出手帶佢入 AIA度做保險，做咗 5年叫做 ok，不過唔算係 top sales囉！」知情人士說。
單身示忠貞
自 02年 Kenneth介入哥哥和唐唐之間，三人行的畫面不時出現，更有唐唐失寵之說。「初時唐唐有介意，不過哥哥嗰時抑鬱，情緒起落得好大、好快，唐唐為咗遷就哥哥就由得佢畀 Kenneth搬咗入嚟。隨住哥哥走咗，邊個係真心、邊個係貪新鮮，都唔使多講。」
哥哥離世十年，唐唐一直保持單身以表忠貞，偶有朋友會勸他「識番個人、搵番個伴」，但唐唐有感難面對榮迷，況且他確實未能放低哥哥，難怪唐唐早前接受訪問時直言：「隨着時光的流逝，傷口總算黏合起來，但仍是傷痕纍纍！」
情人知己 23年
哥哥逝世十周年，連串紀念活動再次勾起歌迷和市民懷念。不過，對摯愛唐鶴德而言， 3650天每天作伴的，都是思念和傷痛。外形俊俏，在電視電影裏的角色往往風流又多情，現實裏的哥哥其實用情專一，去世以前，已經與唐唐維持了將近 23年的情人知己關係。
唐唐的家底和來歷神秘，據外界所知他家人在美國，獨自一人在港生活，曾經在萬國寶通銀行及渣打銀行任投資顧問，後來辭退工作專心替哥哥理財。據悉，哥哥與唐唐相識於 80年， 94年哥哥就在訪問中透露與唐唐拍拖將近 15年：「十多年的愛情，已經轉化為感情，我覺得已經同佢結咗婚啦！」 97年哥哥首次當眾向唐唐獻唱〈月亮代表我的心〉更剖白心底話：「十幾年前在我最失意、經濟有困難嘅時候，呢位朋友將幾個月糧借畀我度過難關，寧願自己天天吃便宜的飯盒，唔講你哋都知，媽咪（契媽張玉麟夫人），係你個契仔唐先生。」
哥哥去世後，唐唐繼承了哥哥財產，並且繼續留守二人昔日的加多利山大宅，直到近年才搬到自置的大潭豪宅，十年來，雖然漸漸行出陰霾不時被拍到與舊友飯聚及打羽球，唐唐卻始終孤身一人，並且向外透露，哥哥的離開是刻骨銘心的傷痛，不會因為時間和空間的改變而有所減輕。
悼念騷狂搵銀
哥哥離世五周年時，前經理人陳淑芬已為哥哥搞過一次紀念演唱會，剛到十年陳淑芬當然不忘再次為哥哥搞演唱會。
今年陳淑芬邀得唐唐出席在銅鑼灣時代廣場舉行哥哥巨型雕像開幕，其後又請榮迷幫忙摺紙鶴達 200萬隻參加健力士世界紀錄大全。不過一輪大龍鳳的背後，點會冇商業因素？在場有售《繼續寵愛•十年》紀念品， 12吋哥哥公仔賣$1,680， tee和紙鶴襟針由$280至$350不等，而輯錄唐唐首肯借出珍貴合照的記事簿亦由$249到$328一本。
不買紀念品亦可在週日（ 31日）參加《繼續寵愛•十年》演唱會，門票由$280至$680，週一（ 1日）亦有另一場紀念晚會，冇歌星唱歌，只有哥哥好友作分享，入場費每位$200，連日本也有三十多間戲院直播音樂會，位位收 3,500円（ 280港元）。單計週日晚的音樂會票房收入，現場近 9,000位滿座，已收近 400萬，再加埋其他售賣的紀念品，和媒體轉播權，收入更和味。其實由哥哥死後，經陳淑芬主辦的悼念活動，只有 05年售賣哥哥的紀念碟和 06年的音樂會，對外宣稱會將收益撥捐紅十字會和兒童癌病基金，其餘亦冇詳細公布。
對於各大紀念品和活動的收益，陳淑芬兒子陳家豪週一（ 1日）對本刊說：「𠵱家都未計數，點知有幾多呀？（咁係捐畀慈善機構定點？）呢啲我唔清楚，你要問番我阿媽！」而本刊至截稿前亦未能聯絡上陳淑芬。看來紀念背後，陳淑芬尚欠哥迷一句交代。
榮迷必搶
限量版紀念品於第一日發售就賣完，其中呢 2本記事簿更印有唐唐和哥哥嘅親密合照，極具收藏價值！
好襟計
31/3音樂會（ 9,000位）
$680
$380
$280
1/4分享會（ 9,000位）
$200
2天收近 600萬
娥姐最驚喜
週日（ 31日）舉行嘅《繼續寵愛張國榮》，令 facebook洗版，除咗歌神壓軸外，梁朝偉嘅隔空對話及娥姐獻唱，成為網友至愛，不過有啲表演就唔係太令網友受落。好似太極玩嘅 medley就唱錯曬歌詞。
爆哥哥胎死自導片結局「要似戴妃咁轟烈！」
《繼續寵愛•十年》的演唱會尾聲，大會安排一張導演凳從台中升起，眾人皆知，哥哥的最後遺願，是執導一部電影。
本刊得悉，早於 99年，哥哥已有兩份劇本在手準備開拍，可是卻找不到投資者。
99年哥哥和 5位參加編劇比賽的創作人，相約在洲際酒店（前名麗晶酒店）傾劇本，據當年有份出席的與會者向本刊透露，當時哥哥一臉認真，胸有成竹地對一班寫手說：「我已經有兩個劇本喺手，其中一個係改編自一個北京傷殘劍擊運動員嘅真人真事，我自己會飾演番嗰個運動員，講佢一路比賽嘅生涯。而另一份劇本係講兩個天王巨星發展嘅地下情，最後我哋會俾成班狗仔隊跟，而我就俾佢哋迫到我走咗上天台。你哋估吓個結局會係點？最後我會跳落去，因為死都要死得好似戴妃咁轟烈！男主角我自己做番，女主角會搵阿梅（梅艷芳），經理人嘅角色我打算搵黃秋生，仲會搵埋謝霆鋒做佢個仔。」
據知哥哥由 99年至臨終前，不斷透過圈中好友如施南生、爾冬陞和褟嘉珍等幫忙，可惜一直找不到投資者，而兩份沒有發生的劇本，永遠也不會實現，但與現實中哥哥選擇輕生的結局，卻不幸言中。
攝影：攝影組
|
鍾意就快D Share啦！
|
|
|