掃呢頁CODE去手機

2013年5月10日 星期五

教會拍拖斷正 鍾嘉欣轉嗒闊少




5月 5日.下午 5點

孖男友返教會

當日鍾嘉欣孖實新歡彭紀諺返北角教會。二人離開時發現記者仍然在場,鍾嘉欣即退後幾步,與男友保持距離。

大封面

教會拍拖斷正 鍾嘉欣轉嗒闊少

李思捷整蠱節目《玩嘢王》贏盡口碑,連帶各集嘉賓亦人氣急升。

上周,李思捷夾埋喊功了得的鍾嘉欣,呃曬全港市民,嘉欣一句「佢係我男朋友嚟㗎」,嚇到全港宅男暈得一陣陣。幕前演技出色,原來鍾嘉欣感情生活亦同樣呃到底,正當大家以為她與六年拖友伍允龍打風打唔甩之際,原來三個月前她已秘密轉軚,搭上同是加拿大籍的有米闊少彭紀諺。

周日( 5日),本刊全程目擊兩人拍拖返北角教會崇拜。不過機警的她一見記者,即煞有介事彈開男方,好友王祖藍和女友李亞男亦醒水分隔兩人。嘉欣 BB誓保純情玉女名銜,梗係唔想讓新戀情浮面啦。

29歲的鍾嘉欣,形象純如蒸餾水,入行多年吸引唔少圈中異性追求。繼林峯後,最近就輪到上位小生陳智燊接棒力追,但據知鍾嘉欣向來對形象花弗的小生一律不為所動,反而對打星伍允龍「從一而終」。可是,本刊收到消息,拍拖六年的鍾、伍,四個月前已協議和平分手。近月情傷的她頻頻返教會療傷,更多得同是教友的李亞男和王祖藍扯紅線,結識大自己一年的教友彭紀諺。雖然盡量將感情事低調處理,但二人拍拖一事,在鍾嘉欣少數教會密友中已非秘密。

避忌分開坐

鍾嘉欣和彭紀諺原本黐實行入禮堂,但當發現記者後,即煞有介事隔開兩個位坐。其間記者見鍾打了一個電話,未幾王祖藍和女友李亞男入禮堂後,即有默契地坐了中間漏空的位置。

祖藍擋駕

二人遭記者撞破後,即甚有默契捉實當日同樣有返教會的王祖藍和李亞男做掩護。

後門速逃

當記者打算上前訪問鍾嘉欣時,鍾表現抗拒,此時王祖藍和李亞男即拖實她走後門,留下男友一人在教會。

鬼祟偷望

鍾嘉欣離開教會時,為避記者追訪,不單依偎在好友李亞男身旁。登上王祖藍的車前,更偷望記者有否跟上來。

搵教友掩護

鍾嘉欣離開大約兩分鐘,記者才見彭紀諺步出教會,但他和嘉欣同樣有正門唔行,反而選擇走後門。發現記者拍照時,他即拉實身旁女教友傾偈。

拍拖返崇拜

周日( 5日)下午約 5時,本刊便獨家斷正鍾嘉欣孖實新歡彭紀諺,拍拖返位於北角教會 Island Evangelical Community Church( ECC)。當時不施脂粉兼戴住眼鏡的鍾嘉欣,與男友並肩而行傾偈。入到禮堂後,高度戒備的她,忽然前後左右環迴望,當發現記者後即緊張低頭與身邊彭紀諺耳語,二人隨即急急腳行到禮堂前排位置坐低。鍾嘉欣坐低前再瞄一瞄記者,雖發現記者沒有跟上前,仍放心不下,竟與男方隔開兩個座位坐。約十分鐘後,王祖藍和李亞男現身教會,似夾定的坐在兩人預留的中間座位。崇拜期間,鍾嘉欣神情閃縮,多次向後望,似察看記者舉動。

個半小時崇拜完結後,王祖藍與彭紀諺率先步出禮堂,而鍾嘉欣與李亞男亦步亦趨跟着。本刊記者邀請兩人影相時,鍾嘉欣卻表現避忌,以「沒有化妝」為由推卻,更刻意避開與彭紀諺眼神接觸。其間她忽然拉李亞男埋一邊急謀對策,評估到避不開記者,鍾嘉欣索性嗌走,王祖藍亦跟隨兩女從禮堂後樓梯離開,彭紀諺則繼續留在禮堂。當鍾嘉欣登上王祖藍座駕駛離教堂之際,此時彭紀諺亦已行到地面。他目擊王的車子離開後,才敢過馬路走人,當他經過王座駕時,更刻意耷低頭沒有與車上眾人打招呼,無私顯見私。

虔誠教徒

08年出道當歌手的彭紀諺,外形不俗,卻沒有簽約大唱片公司,反而活躍於教會樂團,早前更與鬼妹陳明恩合作搞音樂劇。

上周六( 4日),鍾嘉欣在節目《玩嘢王》中,除了呃盡全港人,喊功及逼真演技更令她紅爆網絡, myTV點擊人次瞬間突破 30萬。相反《金枝慾孽貳》除了收視不濟,其點擊人次亦只有 6萬多,相差成條街。

怒斬六年情

鍾嘉欣與伍允龍拍拖六年。在今年農曆新年間,有報道指她偷運伍允龍返加拿大探親,但事後鍾嘉欣卻斬釘截鐵否認其事:「我自己一個返溫哥華,冇人同我一齊去。」當記者問到為何不找伍允龍陪她,她淡然地說:「我想返去見家人,過啲正常人生活。」實情是兩人於農曆新年前已掟煲。

據嘉欣密友透露:「嘉欣 5年前患咗情緒病,開始信主返教會後,都不時約埋 Philip(伍允龍)祈禱讀經,不過最近少之又少。 Philip唔使開工,淨係掛住同班死黨出去玩。有時嘉欣開到聲叫佢陪返教會,佢都推三推四。嘉欣開始諗對方係咪自己嘅 Mr. Right。今年初,兩個坐低傾將來。嘉欣話不如試下祈禱問吓神嘅意見, Philip突然大聲話:『有乜好問啫?我哋依家咪幾好!』嘉欣最後話不如大家分開冷靜吓。」

據知鍾嘉欣在溫哥華避靜期間,曾一度後悔向伍允龍提出「分訊」,不過思前想後,最終決定維持原判。密友續說:「嘉欣為咗呢段感情付出好多,之前仲差啲俾公司雪藏。其實佢一直想早啲結婚生仔,但佢覺得 Philip太細路仔,信仰步伐亦唔一致,所以決定斬纜。」

六年情玩完

07年,有傳當年鍾嘉欣同時被林峯和伍允龍力追,最後鍾棄 chok峯,反而與自己知名度相差一大截的武男伍允龍一齊。有指因為她喜歡對方和自己有相同信仰。如今二人六年情告終,分手其中一個導火線,正正是二人對信仰有嚴重分歧。《 Face》圖片

陳智燊力追

有指半年前鍾嘉欣和陳智燊因拍劇集《幸福摩天輪》撻着,男方更多次做柴可夫車女方返寓所,但據知純粹是男方單方面追求,女方卻對冇宗教背景的陳智燊全無意思。

新舊大比拼

教徒鍾嘉欣專吼教友,新歡彭紀諺及舊愛伍允龍都是基督徒。兩人背景差不多,同屬由外國回流返港的華人,學歷唔差,不過星運平平,事業發展均不及鍾嘉欣,但論對信仰的虔誠度,新歡絕對贏舊愛多多聲。

祖藍扯紅線

回港後,鍾嘉欣重投教會生活,好友李亞男還帶她返鬼佬教會 ECC崇拜。該教會崇拜以全英語進行,教徒多為外地回流返港的華人,大家同聲同氣。當中基督徒創作歌手彭紀諺亦是教友。經王祖藍拉攏撮合,鍾嘉欣和彭紀諺於二月中低調展開戀情。

有教友表示:「 Desmond(彭紀諺)返咗呢間教會兩年,佢同祖藍好 friend,咁祖藍見佢單身寡仔,人品又 OK,咪介紹佢俾 Linda(鍾英文名)識囉,估唔到佢哋發展得咁快,可能大家都係教徒,又係圈中人,會易啲了解對方。」

據知,彭紀諺在加拿大長大,父母在當地開餐館和超級市場,家底唔錯。 07年尾回流香港做歌手,更與鍾嘉欣屬同期樂壇新人。由於對宗教的熱誠,其大部分作品都是以宣教為主。雖然身份地位不及女友鍾嘉欣,但以嘉欣 BB過往揀對象的態度,彭紀諺絕對符合嘉欣口味。

周三( 8日),本刊致電彭紀諺,其經理人 Celine代他說:「佢哋係識咗一段時間,係有一齊返教會。(係咪拍緊拖?)我唔清楚,不過將來嘅嘢好難講,等上帝安排啦。(覺得嘉欣點?)我都有同佢哋一齊返教會,嘉欣係個好乖嘅女仔。如果 Desmond同佢兩情相悅梗係好,我都戥佢哋開心。」

而鍾嘉欣舊愛伍允龍,本刊致電其所屬公司,發言人 Angela Wong說:「我唔可以幫佢答喎!我要摷到佢先得㗎,我點知佢喺邊呀!」說罷隨即掛線,看來失戀情傷的伍允龍,還未夠時間復元。至於鍾嘉欣,至本刊截稿前仍未有回覆。

噴血三點式

鍾嘉欣與伍允龍拍拖期間,由於男方不准女友着少布出席活動,因此鍾甚少拍性感照。早前二人分手,鍾即接下纖體廣告,罕有以三點式示人,看來新男友比前度更通情達理。

渴望着婚紗行教堂

鍾嘉欣雖然甚少提感情生活,但早前在訪問中,亦坦言希望出嫁時,可以穿上婚紗和新郎踏進教堂。

據知今次擔當嘉欣媒人公的王祖藍曾對友人說:「 Desmond唔好仔,都唔介紹俾嘉欣啦,唔驚俾嘉欣鬧呀!」

群星力撐

少有幕前演出的彭紀諺,因活躍於教會活動,故與一眾藝人教友熟絡。對於他跟嘉欣 BB的戀情,眾人雖然口密,但言談間卻露出端倪。

王君馨:我會祝福佢!

「藝人之家有見過 Desmond,見面會傾偈打招呼。作為嘉欣好朋友,如果有一個認真嘅男仔出現,我會祝福佢。」

高皓正:佢揀女友要求高

「我同 Desmond好熟,以我所認識嘅 Desmond係唔容易對一個女仔動心㗎。佢揀女友好慎重,要求好高,唔係咁隨便。(嘉欣條件 OK嗎?)咁佢條件梗係高啦!」

陳明恩:佢對人好好

「同 Desmond喺音樂團契聚會度識,上年佢個人音樂會都搵我做嘉賓。我印象中 Desmond靚仔,有風度,對人好好,但就唔清楚佢嘅戀情。」



鍾意就快D Share啦!