電視撈飯： 抄橋獎門人 胡鬧搶客
無綫呢期劇集收視認真麻麻，《金枝慾孽貳》今個星期播到結局篇，上周算好番少少，平均有20點（約128萬觀眾），《情越海岸線》就平均26點（約167萬觀眾），兩劇分別升咗1點，周日首播嘅《超級無敵獎門人》終極篇有平均27點收視（約173萬觀眾），高過曬黃金時段嘅劇集，算係挽回少少面子。
《獎門人》節目回歸，「獎門人」曾志偉特登帶埋班獎老、嘉賓飛去福岡拍外景，前晚呢集係預告，雖然都係一貫嘅虐待金剛情節、玩嚇核突嘢，但勝在有高海寧、呂慧儀、Mandy Lieu等胡胡鬧鬧，令觀眾睇得開心。
【翻版】
■首集獎門人喺福岡拍攝，輕輕鬆鬆就做咗上周收視冠軍節目。 電視圖片
網友點都撐
不過心水清嘅網友睇完就話《獎門人》抄韓國節目《Running Man》，話無論玩法定懲罰都一樣，其實《獎門人》一路以嚟都俾人話抄日本、台灣嘅節目啦！係咪抄都好，有網友就話睇咗《獎門人》十幾年，會繼續睇落去，撐硬咁話。
【正版】
■有網友發現獎門人有抄襲韓國節目之嫌，無論遊戲玩法同處罰方法都似到十足。電視圖片
【翻版】
■無論獎門人係咪抄襲，死硬派網友表示都會繼續睇落去。 電視圖片
【正版】
電視圖片
無綫外事部副總監曾醒明噚日喺電視城話劇集收視慢慢上升，而《金枝貳》有八個投訴，話內容沉悶唔吸引等，另之前肥媽瑪利亞主持嘅《食平D》講益母草補身被投訴，曾生話：「我哋喺myTV勾出嗰集，糾正番啲內容至再上載，聽晚《東張西望》會請中醫講番益母草正確食療。」而高層陳家揚就解釋番有人質疑點解有藝員唔使試咪可入圍《星夢傳奇》，佢話因知道有啲係唱歌出身，故可免試音：「最緊要啱唔啱節目內容，如果藝員孭劇撞期，會撥去第二季，6月中公佈入圍名單，節目7月出街。」
另通訊事務管理局都收到投訴，五宗不滿《食平D》提議孕婦食益母草煮蛋茶，《萬眾同心公益金》就有三宗不滿用錢買表演機會等，而《獎門人》亦有六宗，認為不宜兒童觀看、抄襲等。
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
|
鍾意就快D Share啦！
|
|
|