探熱針
《金枝》女壓力爆煲 伍詠薇中醫養命
新劇《金枝慾孽貳》上週一開播，觀眾口碑十分麻麻，收視平均亦只得二十三點，成績遠低於○三年出街的《金枝》壹。
珠玉在前，演員孭住包袱開工，換來沉重壓力負擔，孭重飛的鄧萃雯患上自主神經失調症，蔡少芬要放棄照顧女兒，集中心機背對白，在劇中飾演淳太妃單挑兩屆視後如妃的伍詠薇，健康同樣出問題，劇集收工至今，依然要睇住中醫。
對於出盡力卻被網民插爆指演技浮誇，伍姑娘說：我照阿戚（戚其義）要求做。
失調又便秘
自薦演出《金枝慾孽貳》淳太妃一角，演齡超過二十年的伍詠薇，從無諗過與神級監製戚其義合作，後果變成受靶。
可以跟出名好戲又認真的鄧萃雯合作，口講要自己保持開朗心境去開工的伍詠薇，拍攝期間竟然出現飲食失調甚至緊張引致便秘，亦引致過去返內地搞美容，劈住酒傾生意應酬，一度令肝功能受損的問題又再度 復發。
「伍姑娘做嘢好投入，之前兩年冇拍劇，集中喺內地搞自己品牌美容產品，好多時都返去內地應酬，因為要成日飲酒，搞到個肝都傷曬。到佢拍《金枝慾孽貳》就更辛苦，伍姑娘話自己未試過要記咁長對白，加上對住雯女有壓力，佢以為自己背到好熟，點知一接觸到雯女眼神，個腦就突然空白曬，要 NG再嚟。拍完套劇，伍姑娘都再睇番中醫，又 keep住行山，要調理番好個身體。其實劇中嗰班宮女個個都捱到爆曬，好多人健康都有問題，只係冇雯女咁大鑊。」劇中工作人員透露。
行山瑜伽減壓
上週五（四月二十六日），連續多日為《金枝貳》出席宣傳活動的伍詠薇，抽出時間去做運動及睇醫生。
中午十二點左右，她由貝沙灣屋企出發，到銅鑼灣瑜伽中心跟老友黃佩霞做運動兩粒鐘後，二人孖住到附近的車仔麵檔醫肚。食飽後，伍詠薇到莎莎買護膚品，再行過耀華街睇中醫，黃佩霞一直陪伴在側。
戚其義要求
對於拍《金枝貳》壞了健康，伍詠薇說：「肝嘅問題係以前積落，為咗盤生意，嗰兩年真係好辛苦；拍《金枝貳》嗰段時間我好緊張，搞到自己好易攰要瞓好多，到而家都要 keep住行山做瑜伽減壓。」
至於被網民插演技浮誇，伍詠薇解釋是按戚其義指示做。「我唔係幫自己講說話，係阿戚想擺一個伏線喺劇入面，因為同如妃鬥嘅係得我一個，對宮女，淳太妃要好溫柔，只係對如妃，先咁用力。」
飛紙仔出禍
○三年，無綫推出由戚其義監製、周旭明編劇的《金枝慾孽》，各方面都大獲好評；事隔九年，二人再合作炮製《金枝慾孽貳》，為求保住前集聲勢，二人對選角、對白、演員表現都極為着緊，甚至搞到劇中不少演員壓力爆煲。
mailto:nextb@nextmedia.com
|
鍾意就快D Share啦！
|
|
|
