2/6一家嘆茶
本周日，古明華同妻女晨早出街嘆茶，之後三人一同步行回家，沿途一家人有講有笑。
娛聞樂
腎病女反叛難教 古明華：我嬲到衝落街！
去年憑《巴不得媽媽》勇奪「最佳男配角」的古佬(古明華)，工作愈來愈忙碌，走紅的代價便是犧牲陪伴家人的時間。現忙於拍攝新劇《貓屎媽媽》的他，就連下周日(16日)的父親節也未知有否時間跟女兒慶祝。
雖然為口奔馳，但僅得一粒女的古佬，對女兒 Tammi照顧周到。十五歲的 Tammi，三年前患腎病，至今仍要定時覆診及食藥。見女兒長期受病魔煎熬，古佬一直心痛女兒。
多年來，古佬只打過女兒一次：「 Tammi小二時發脾氣唔做功課，我忍唔住用間尺，好大力打咗佢手仔一下。」而正值反叛期的 Tammi，早前貪玩打機夜瞓，話極唔聽，甚少發火的慈父古佬，由於憂心愛女病況惡化，最後嬲到衝落街，女兒才識驚改過。
女兒的腎病是長期戰爭，所以古佬兩夫婦不但細心照料愛女飲食，每天管接管送，對女兒更是百般遷就。不過，近日古佬見女兒 Tammi開始懂得關心他，令他心中暗喜：「我估今年 Tammi可能會同我慶祝父親節，希望唔係我一廂情願啦！」
月花萬元醫病
令 Tammi突然「長大」，源於兩父女一個月前的冷戰。 Tammi三年前開始患上「腎小球炎症」，病發時需要在家休養，試過嚴重到全身水腫，每月單是醫藥費曾經花近萬元。最近一年 Tammi身體轉好，惟每月仍需定時覆診食藥，但醫藥費已減少至 3千蚊，上學率亦由 7成上升至 8成。
康復在望，但 Tammi見身體稍為好轉，加上正值青少年反叛期，近日沉迷打機，屢勸不聽。愛之深，責之切！眼見女兒捱眼瞓打機，憂心女兒健康的古佬，佛都有火。
古佬說：「我之前已叫老婆同個女講，要佢學習分配時間。佢有病喺身，仲成日掛住上網打機，玩電腦，唔肯早啲瞓，咁對身體好壞。嗰日得我同 Tammi喺屋企，我特登唔出聲，望住佢足足一小時。點知佢完全冇反應，仲照玩，我真係好嬲嘭埋度門，衝落街冷靜咗兩、三個鐘。我走咗 Tammi至知大鑊。第二日起身，個女喺 WhatsApp度知衰認錯。之後我再同佢傾咗兩個鐘，解釋我嬲都係為佢好。」
古太管接送
事實上，古佬與太太 Terri一直對女兒呵護備至。「佢每個朋友我哋都識，而且每日都係由老婆送佢返學放學，出街時都要報告行蹤。」雖然 Tammi現時就讀於觀塘區的福建中學，不過自女兒發病後，古佬對愛女管教已經放鬆很多。
古佬說：「佢係獨女，我點會唔錫。其實每次教仔女都係一次學習，我仲係學緊點做人老竇。佢成日話自己得十歲，向我詐嬌，成日俾藉口放縱自己，我覺得小朋友唔可以咁。不過，自從個女發病後，我明白最緊要佢健康，讀書只要盡力就得！」
星爸唔易做
父親一向唔易做，如果仔女被病魔折騰，更是痛在父母心。做星級爸爸更難，好似周啟生咁，就因為獨留患有學習障礙的兒子在家，而被檢控。
|
鍾意就快D Share啦！
|
|
|