含情望實
徐子珊和電影幕後戚家基嘆啡雞啄唔斷，傾了兩個鐘。其間男方被她逗得瞇瞇嘴笑，徐子珊亦露出一副冧樣。
滾熱辣
甩拖一年 徐子珊中秋約會幕後熟男
無綫劇《神鎗狙擊》收視平平，不過女主角徐子珊的 chok爆槍戰戲就成為網上熱話。有網友更幫她「加工」假露點，足見她有多大魅力。
現實中，擁有 sexy嘴的徐子珊亦相當有男人緣，緋聞列表一匹布咁長。不過自去年與眼科名醫謝偉業掟煲，她的新戀情一直冇乜聲氣，直至中秋節正日（ 19日），本刊記者拍下她與一四眼熟男在尖沙嘴 K11一咖啡店聚會兩小時。其間徐子珊更送禮給男方，可見兩人交情非淺。
周一（ 23日），記者在電視城訪問徐子珊時，她離奇十級戒備，更堅稱中秋節要開工冇約人。看完記者手上照片後，又忽然「恢復記憶」。係咪好奇呢？
34歲的徐子珊，電力驚人。入行 9年，無論天王、導演、小生、髮型師抑或道具幕後，都曾傳過是她的裙下之臣。但自從去年遭眼科醫生謝偉業飛甩後，徐子珊感情生活卻變得一片空白。
約會導演
近日，一向拒談感情的她，罕有公開擇偶條件；「要年紀大過我，經濟穩定。其實依家都有人追我㗎，啱嘅話可以三個月內結婚，之後生仔即刻退休。」徐子珊放聲氣想拍拖，原來受其母親影響：「阿媽好急，叫我搵到合適嘅結婚對象就要好好發展，唔好拍散拖。搞到有男仔喺度嘅朋友飯敍，我都唔敢亂去。」
言猶在耳，上周四（ 19日），中秋佳節正日，本刊記者目睹徐子珊竟然佳人有約。當日約下午四點半，一頭散髮，身穿格仔衫的徐子珊，單拖到尖沙嘴 K11商場地下的「 Espressamente Illy」咖啡店嘆下午茶。而她揀選近行人路的座位，方便睇車。最初記者以為她孤獨度中秋，但過了半小時後，一貌似穀德昭的四眼熟男忽然出現並坐在她對面，只見兩人不時細聲講大聲笑。識𠱁人的徐子珊更滔滔不絕發表言論，冧得男方全程笑瞇瞇。臨離開時，她更送上一袋禮物給男方。兩人傾足兩小時，才依依不捨步出餐廳，分頭取車離開。
據知，這名年約 50歲的四眼熟男，名為戚家基，在電影界大有來頭，曾分別監製多套賣座電影包括成龍《重案組》和《特警新人類》，難怪得到徐子珊的青睞，相約在人月兩團圓的中秋節見面。
金牌監製戚家基
除了監製和導演多套電影，戚家基亦是前香港國際電影節總監，早年更擔任 Cinemax自選影院台長。早前他與陳可辛成立「人人電影公司」拍攝電影《十月圍城》及《血滴子》。
近年他每套作品都有預徐子珊擔正做女主角，包括去年的《神獸巴打》和今年的《 2013恭喜發財》，上月再度合作台灣新片《我的情敵是超人》，難怪二人會這麼投契。
識揀叻人
徐子珊貴為 04年港姐冠軍，電力驚人，拍親劇都例與拍檔傳撻着。她亦曾與多位有權勢的城中名人傳緋聞，位位非富則貴，可見她的男人緣不俗。
回應慌張
周一（ 23日），記者在電視城等候徐子珊。當記者欲上前與她做訪問，她卻一支箭衝入服裝間。一小時後，她在經理人 Candy陪同下才肯接受記者訪問。起初她堅決否認在中秋節與男性茶敍兩小時，但當知道本刊「有相揸手」，她才忽然記起有此事。
記者：記 徐子珊：徐
記：中秋點過？有冇約家人或朋友慶祝？
徐：開工囉！我日日都要開工，中秋我就冇（約人）啦！
記：有人見到你中秋嗰日同個高大男人食飯，仲傾足兩個鐘？
徐：……（失笑）幾時嘅事呀？真係唔記得！
記：係咪新男友呀？
徐：呀，你突然間咁問起我，我又醒唔起。
記：你仲送咗袋禮物俾個男人！
徐：（繼續失憶）幾時嘅事？（忽把聲線提高八度）喂，你有冇相，不如俾我睇，我真係唔記得，突然之間。
此時記者遞上照片給她看，她看完即面露尷尬之色。
徐：哦…… Peter！
記：見你送袋禮物俾佢？
徐：（忟憎說）唔係呀！我俾番書佢咋！真係冇嘢，完全冇事發生。
訪問到此，記者打算離開。未料記者行了數步，徐子珊忽然緊張地嗌停記者，更自爆說：「我講清楚啲，嗰個係導演嚟㗎……佢只係我嘅朋友，你哋千祈唔好誤會。」（點解之前話冇約人？）一向伶牙俐齒的她卻忽然吞吞吐吐說：「……咁我記性唔好嘛！」
曾表示不會亂與男性約會的徐子珊，卻在中秋節單獨約會導演戚家基，加上徐子珊最初死撐當日沒與男性食飯，確實離奇。
屢做箭靶
徐子珊向來冇乜觀眾緣，今次在《神鎗狙擊》做差婆，其濃妝艷抹及高踭鞋勁趕客，加上懶 Q招牌嘟嘴，難怪被網友踩到盡。
|
鍾意就快D Share啦！
|
|
|
