王維基單挑 CY 王維基,MW,

得知無牌後一直冷靜面對嘅王維基，周二（ 22日）回應特首言論時，提醒官員要「講真話」，又話「你真係唔好激嬲我！」

媽咪姐

王維基單挑 CY

周日（ 20日）媽咪姐再一次確認 C9真係唔易做！尤其喺「一男子因素」當道嘅時候。繼爭牀位、搶奶粉、反國教、乞幼稚園報名表之後，依家又逼到我哋呢啲查實最想日日 high tea、追吓電視嘅 C9仔要出嚟遊行，同成班港視藝人一齊嗌口號，求公義！

其他影片

講真吖，喺樣樣都貴嘅香港生活，大家都係求安穩、有錢供樓啫。所以唔少港視藝人都話公司不獲發牌，真係好徬徨，搵緊後路。不過就點都會企出嚟撐王維基，因為呢個政府實在係「黑箱作業」！嗱，你睇龜縮咗成個星期嘅特首梁振英，周二（ 22日）先帶住三張唔知由幾多人度咗幾多日、請示過幾多次「聖意」嘅貓紙，假爆回應免費電視發牌由三變二嘅決定，話乜嘢「來者不拒」唔係政府審批制度一部分，又話早知發牌結果會「順得哥情失嫂意」，最緊要嘅係……重複 4次話：無政治考慮喎！

特首出招

周二（ 22日）梁特首見群情洶湧，喺出席行會前，先接港視員工請願信，話：「辛苦曬你哋喇。」仲擺出一副慘樣，真係唔該曬！

只係短短幾個鐘，王維基已經準備好講稿，喺記者會上逐點擊破特首論述。佢特別 highlight咗「持久戰」呢 3個字，可見其決心！

周日（ 20日）媽咪姐同 12萬香港人一齊行出嚟，同一班港視藝人齊齊話俾政府聽，我哋睇電視要有選擇！要解釋！要公義！

即係咁，媽咪姐同各位嘅眼光係雪亮嘅，真理從來都係愈辯愈明！就同日下晝啫，香港電視主席「魔童」王維基即刻開記者會逐點反擊，提醒最有語言偽術天份嘅梁特首， 1998年訂立嘅開放廣播市場政策就係「來者不拒」，廣管局前年已經確認 3個申請都符合發牌要求。特首同行政會議突然改變「來者不拒」政策，係欠缺法理基礎！之前一直表現克制嘅「魔童」到呢刻忍唔住鬧爆：「如果特首連改政策都懶得諮詢，話改就改，究竟香港係法律大、政策大、抑或特首最大？」係咯，乜我哋依家時光倒流，仲係封建社會咩？阿特首係咪以為自己係天子？ Excuse me，查實你每年𢭃緊嗰 446萬，媽咪姐同全港有交稅嘅市民都有份俾錢！

最後，宣布入稟法院，就拒發牌事件要求司法覆核嘅王維基話，呢場係「持久戰」！無錯，歷史話俾我哋聽，追求公義嘅路從來唔易行，正如世上一向無免費午餐。要撐落去呀，王維基！

港視藝人分兩派

基本上，同港視拍過嘢嘅藝人，都挺身遊行撐王維基。不過講到未來發展，有人選擇支持魔童，點都唔返 TVB；有人就搵定後路。

繼續撐

廖啟智

我冇乜去向，冇咩想講，都冇諗過返無綫，我喺 HKTV係自由身，我只係想話俾大眾知我哋嘅工作情況。

元華

好彩有啲積蓄，到環境唔好時可逐啲逐啲搣。（ TVB有冇搵番你？）冇！暫時未考慮，話唔定政府轉個頭發番個牌，好難講嘛！

周家怡

王生真係俾好多機會演員，我知自己係咩位，佢都俾我做主角。嘩，一個咁嘅老闆係非常難得，依家已經唔淨止係我哋自己嘅問題，係香港嘅問題！

張可頤

今日嚟講我同 HKTV係冇合約關係，我係覺得 HKTV凝聚咗嘅力量同精神，我係要支持！我好想維護呢份精神，呢份香港精神。

謀後路

蒙嘉慧

我冇後悔（加入港視），我流緊 TVB嘅血，想 TVB好，但唔代表想其他（台）衰。

林嘉華

只要有實力就有人搵你合作，希望同有誠意嘅公司合作，我唔會標籤任何一間公司，同 HKTV係部頭形式合作。

梁小冰

我同王維基拍劇可以好自由，可以去全世界拍劇。我現時仲有合約，亦歡迎同任何一間電視台、製作人合作。只要劇本、角色啱，我唔介意同任何一間機構合作。

艾威

（有冇考慮返 TVB？）咩情形都有可能嘅！（驚唔驚被壓價？）如果佢（ TVB）開嘅價錢我接受得到，就唔係叫低，永遠同任何機構接觸都係要傾價錢，但我最想得到公義嘅平反。

其他影片

鍾意就快D Share啦！

下一篇 》