活動自如
今年初劉家輝仍是半身癱瘓，最近他已可用左手拎起水杯飲可樂，又可以拿起匙羮食嘢同講電話。
娛樂喧
賣樓籌生活費 劉家輝搬出老人院
58歲的劉家輝（原名洗錦熙），兩年多前因中風導致右邊身癱瘓，他一度喪失求生意志，徘徊生死邊緣。前助手兼前委託人 Eva（馮映華）私吞近 200萬工作酬金唔認數，身為劉家輝好友兼現任委託人樊奕敏，近年不停為他打官司追討，希望早日經法律途徑取回他的血汗錢。
劉家輝現時入住的老人院醫療開支龐大，每月要花約 10萬，他惟有賣樓套現作為日後養老和醫病之用。樊奕敏表示：「佢嘅錢所剩無幾，遲啲要搬離老人院再諗辦法。」唯一慶幸的是，今年四月，劉家輝的體重已由皮包骨的 110磅回升到 120磅，最近他還能坐輪椅出外食飯嘆茶。
10月 6日，本刊發現劉家輝由女看護陪同下到尖沙嘴美麗華酒店的國金軒酒家。身穿藍色格仔恤衫的劉家輝精神不俗，而且胃口極佳，桌上每碟點心只要女看護幫他細心剪碎，他都能自行用匙羮放入口進食。記者更聽到劉家輝用微弱的聲音向身旁的女看護表示要飲可樂，之前連說話都有困難的他，看來真的迅速康復。
今次約會的目的，是安排在上環擺檔的「檸檬王」唐崇超與劉家輝見面，皆因唐很希望見到這位昔日朋友，幾經轉折才聯絡上樊奕敏。
當日嘆了兩小時中茶後，劉家輝主動問身邊友人吃飽未？更示意大家要吃清桌上所有食物不要浪費。不良於行的劉家輝，每次外出都好大陣仗，由於仍要以輪椅代步，上落七人車都擾攘一番才安頓好。離開酒店後，他便返回老人院休息。
生活費成問題
據知，劉家輝近年入住老人院每月要花近 10萬元，不單耗盡他僅有的積蓄，好友樊奕敏私下更補貼了不少。不幸的是，前助手兼前委託人 Eva早前只交還部分屬於劉家輝的血汗錢（約 47萬港元），根本不足以支付龐大的醫療費用。據知情者透露，劉家輝的生活已捉襟見肘，「劉師傅啱啱先 cut咗針灸同中醫，嗰度每個月都使萬幾蚊，再加上每日做物理治療，所有開支加埋一啲都唔平。佢連生活費都成問題，惟有 cut啲醫療開支啦！聽講佢嚟緊要賣樓套現，拎番幾百萬作為生活費。不過佢老婆依家霸住間屋唔肯搬走，有排搞。」
最壞打算返大陸
劉家輝為節省開支，短期內還要搬離老人院，入住政府醫院的療養院或遷上大陸養病。本刊聯絡上樊奕敏，她直認不諱：「 Gordon（指劉）每月開支真係好大，兩個貼身專業嘅醫護人員 24小時服侍佢，每日都有私人物理治療師幫佢按摩手腳，令佢右邊身嘅肌肉放鬆，仲有職業治療，呢樣好重要。為咗要融入以後嘅生活，佢要重新學習扣鈕同着衫等自理能力。若然要令 Gordon好轉，要花好多錢，好多都係基本開支，減無可減惟有搬返自己屋企。可惜佢間唐樓冇電梯，環境絕對唔適合佢住。我有問過 Gordon啲仔女，佢哋話好歡迎喎！但六層樓，試問對一個中風病人又點方便呢？我會幫佢諗吓辦法，最壞打算返大陸養病，慳啲囉！」
前路茫茫的劉家輝，由於仍手持堅道一個市值 800萬的唐樓，不能申請政府津貼，但該物業現時由他第二任妻子與兩名子女居住。早前更有報道指其妻把單位大翻新，有意接劉家輝回家休養，但事實上她卻沒有加添專為中風人士而設的設施。有家歸不得的劉家輝，最終可能真係要搬返大陸。
追數實錄
劉家輝前助手兼前任委託人 Eva（馮映華）私吞劉近 200萬工作酬金，最後雙方要對簿公堂。據知當日劉家輝把酬金交給 Eva暫時保管，有需要時便會取回。年前他中風後半身癱瘓，急需要回該筆救命錢，奈何 Eva遲遲不還。
早前 Eva已按法庭指令，先後兩次把合共 47萬交還劉家輝，但 Eva報稱曾為劉墊支 46萬使費，故提出反申索，由於雙方就餘額調解不成，該案件將在明年三月再審訊。
|
鍾意就快D Share啦！
|
|
|
