何詩上次開港騷已經係 4年前，難得再次踩入紅館，何詩把握機會玩驚喜。 36歲，一向以中性打扮嘅佢今次又曬腿又着裙又跳火辣舞，口味係重咗啲，但算有啲新意。
FBI
着何家 tee玩煮飯仔 何詩鄧九雲一家親
孭咗梅艷芳徒弟個朵多年嘅何韻詩，最近唔只趁師父 50歲生忌推出翻唱師父經典金曲新碟《 Recollections》，仲趁勢開騷吸水。上週六（ 19日），一連三場嘅紅館演唱會緊接開騷。
相隔 4年再開騷，一向鍾意中性打扮嘅何詩當然特別瞓身，化身百變女郎玩驚喜。一連三晚嘅演唱會何詩都主攻露腿，短褲短到差唔多露出八月十五不特止，仲同男女 dancer大跳 dirty dance，不過全場焦點唔係何詩嘅歌舞，反而係佢個台灣緋聞女友鄧九雲。鄧九雲連日都高調踩入紅館撐何詩，何詩唱〈詩語胡說〉時仲望實鄧九雲唱， FBI有啲毛管戙囉！
FBI仲發現，週日晚第二場，鄧九雲見冇傳媒採訪，即刻大解放着住一件背上寫上「 FAMILY」字樣嘅 T恤捧場，有二五八畀 FBI知，原來呢件 T恤係何詩專登訂做畀屋企人着，而今次鄧九雲為何詩開騷，更專程由台灣飛嚟香港，照顧何詩一日三餐。睇嚟鄧九雲已成功入主何家，大家遲啲分分鐘要改口叫「何太」。
|
鍾意就快D Share啦！
|
|
|
