網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2013年11月15日 星期五

連環挑機 阿叻:如果熄(電視)到兩點,我死咗去囉! 阿叻,陳百祥,MW,




嘩,個樣使唔使咁囂張先? Btw,叻哥你個「門檻」咁低(兩點),會唔會輕視咗 TVB,驚唔驚殼王唔 like呀?

媽咪姐

連環挑機 阿叻:如果熄(電視)到兩點,我死咗去囉!

繼曾志偉被指阻業界工會參與撐港視爭發牌遊行後, TVB揸 fit人殼王陳國強另一波友阿叻陳百祥,最近出埋嚟「爭寵」喎!對於網民發起於無綫台慶日熄電視,以行動控訴電視業壟斷失衡,阿叻周日( 10日)就寸爆:「如果熄機,得番兩、三點收視,我就跪喺度,由將軍澳跪到返屋企!」

當然,咁「驚天地」嘅言論一出,網民街坊即刻群起鬧爆,仲有熱心人士開埋 fb專頁去號召網民齊齊熄機一償阿叻「心願」!而當事人呢,先公開承認自己係「鑽石級擦鞋仔」,周三( 13日)再發「偉論」:「我就同網民啱啱相反㗎!佢嗌熄電視,我嗌人開機,鍾意正能量,開開心心!咪睇佢(網民)針唔針對到我囉。吖,我唔係好識中文,但我淨係記得魯迅一句說話,橫眉冷對千夫指!

「收視?我都未驚過!你咪熄囉。睇吓你熄機,定人哋開機睇我?如果你熄到兩點,我死咗去囉!志偉話我玩得大喎,唔算大吖,可以死咗佢㖭。」

即係咁,爭住認「擦鞋仔」,仲咁「真心」嘅,堅係少見囉!依家我哋嘅選擇有幾多?生活得有幾開心?就個個心照。阿叻哥,正能量唔係講就有㗎!我哋唔係你個 friend成龍,「天災論」一出就應咗嘞。媽咪姐中文都唔叻,但都想送幾個字俾你:人必自侮而後人侮之!

P.S.唔好再「打搞」一生高風亮節嘅魯迅先生嘞。佢嬲起上嚟,夜晚去「搵」你就唔好啦!

阿叻自爆話贏馬贏咗 120萬,老婆黃杏秀好開心,又話 TVB一台獨大同自己一樣,因為有運。 Well,阿叻哥你講嘢咁似你個 friend成龍嘅!

元華

「佢要遵守承諾,如果真係得兩點收視,要向市民負責!不過,如果真係發生(指兩點收視),都幾搞笑。(支唔支持熄電視日?)嗰日有朋友結婚,要去飲,都唔得閒睇電視。」

鮑起靜

「幫 TVB打工幫 TVB講嘢,可以理解,佢(阿叻)都係搞笑。(網民話佢開兩點收視,太低喎?)點會兩點, TVB就算播空白嘅嘢都有 10點收視啦。(你會唔會支持熄機日?)可以支持吓,我一向都睇 now同 Cable(有線)啦。」

張松枝

「好好笑囉,佢係喜劇泰鬥。(支唔支持熄電視日?)我一向都熄電視,唔俾個仔睇電視,因為仲未有好嘅節目!」

夏雨

「阿叻一向都係語不驚人誓不休,如果佢夠膽話今年嘅收視跌兩點佢都跪返去,我就覺得佢叻仔!根本無可能只有兩、三點,亞視都無人睇。」

網民寸爆阿叻籲爭氣

點解阿叻會咁囂屎?梗有原因嘅!問心嗰句,大家真係自細習慣一返屋企就開電視,晚晚煲劇送飯㗎嘛。突然間,話要熄機喎,點都有啲掙紮同忐忑嘅。不過有句說話都係由細聽到大,幸福並唔係必然㗎!學網民話,我哋依家唔做啲嘢,第日可能一開電視就個個台都係 CC「 TVC」、 CC「 TVD」、 CC「 TVE」㗎嘞。香港人,係時候出手熄電視!

周二( 12日)媽咪姐喺旺角巧遇喺茶餐廳睇緊《 On Call 2》嘅森美,問佢係咪支持 TVB,佢就咁答:「又無『香港電視』做,又無其他台。好在佢無開亞視啫?如果佢睇亞視,我會叫佢熄機!」咪係囉,根本一台獨大係因為無得揀,我哋要多幾個有心有力嘅電視台呀!

《警界線》二、三集率先睇

「香港電視」被拒發牌事件愈搞愈大,而佢嘅重頭劇《警界線》嘅網上點擊率亦已經有 110萬,不過王維基堅持要喺大電視先播出第二集。之但係,為激勵大家繼續求公義,媽咪姐特登搵咗一啲未見街嘅情節俾大家率先睇!劇集創作總監朱 Sir話《警》劇唔似《無間道》咁簡單,每集節奏明快、有不少寃案要觀眾思考,唔到最後都唔知邊個係人?邊個係鬼?

朱 Sir話老闆王維基有 Plan B、 Plan C應付,但《警界線》幾時有得足本睇?真係要睇天睇政府睇我哋嘞!

戲骨火併

智叔係警方臥底,但有機會拉大賊林嘉華時,佢竟然放走對方,二人關係千絲萬縷。

多災多難

周俊偉兒子首集已被打跛雙腳,之後繼續多災多難,不幸事情一而再,再而三發生喺囝囝身上,令周俊偉變得更偏激。

天台和事老

薑浩文做林嘉華馬仔,雖然係黑底,卻心地善良,不斷為林嘉華同智叔做和事老,希望二人繼續做兄弟。



鍾意就快D Share啦!