電影煞科三個月，但上星期王祖藍、許冠文又再埋位補拍跳樓場口。
探熱針
睇拍戲 許冠文王祖藍 玩謝葉念琛
已經七年無拍戲的許冠文，早前出山同王祖藍孖咇拍新片《 Delete愛人》。冷面笑匠認真慣，要求對手圍讀、 take完睇 playback再俾意見，投入過人；加埋王祖藍頻頻改劇本，導演葉念琛被二人舞到陀陀擰，到做後期才發現原來有場戲漏拍，煞科三個月，上週四（十一月二十八日）晚急 call兩位男主角埋位補拍執漏。
提早到講數
電影要補拍是一場王祖藍跳樓戲，晚上十一時通告，許冠文、王祖藍未夠十時，已經蒲頭，不過替身試好位，攝影隊在天台食風半個鐘，兩位男主角才施施然行上天台。
「佢兩個（許冠文、王祖藍）早到都無用，喺下面傾場戲點拍傾咗成個鐘都講唔掂數，要導演三催四請先埋位。」一名有份在場開工的工作人員說。
上到天台，經工作人員的講解，戴住威吔的王祖藍同許冠文正式埋位，二人七情上面，兩三個 take，導演已經收貨，拍完一個鏡頭，王祖藍在天台同工作人員吹水，許冠文就第一時間閃返落劇組一早預備的單位休息，唔願食風。
全方位監控
自稱鍾意自導自演多過做演員的許冠文，對上一部電影已經是○六年的《寶貝計劃》。拍慣大製作的他，當決定接拍葉念琛新作後，已急不及待追攞完整劇本，十分緊張；開工期間，即使自己無份埋位的場口，他都要睇 playback照俾意見。
「佢當正自己開戲做導演咁，好多時連擺機位都睇埋，就算場戲無佢份，照樣企喺旁邊𥄫到實，只要發現有問題，就拉導演埋一邊吱吱噚；話曬係老前輩，導演當然要俾面佢，點都執一執再拍過。」
導演做磨心
去年孭埋劇集《老表，你好嘢！》編審的王祖藍，進軍大銀幕更變本加厲大改特改，就算對手是許冠文，王祖藍一樣冇有怕，兩人不時為對白、語氣爭持不下，拖慢拍攝進度，導演不時要花口水安撫兩人，搞到漏拍都唔知。
「佢兩個大帝一齊開工，一定有遲無早，王祖藍將啲對白改到七彩，許冠文又成日堅持己見，兩個一傾唔掂，就搵導演做磨心，要氹掂佢兩個拍場戲，導演要付出多幾倍腦汁，掛萬漏一，搞到拍少咗場戲都唔知囉！」劇組人員說。
|
鍾意就快D Share啦！
|
|
|
