甘國亮表示市民邊睇邊鬧爛劇是縱容，「市民唔睇，你睇佢哋仲可以點經營。」
探熱針
炒冷飯 翻拍《無雙譜》救亡 甘國亮：拍得番先算！
為提升員工士氣，無綫行政主席梁乃鵬早前公開承諾，要有八成劇本才開劇，在人才流失的情況下，緩兵之計是重拍已有完整劇本的經典劇，其中包括甘國亮的《無雙譜》及王晶編劇的《流氓皇帝》，對此應變措施，兩前要員見解南轅北轍，甘國亮抵死說：「拍得番先算啦！」
重拍未必好
不論港視的發牌風波如何收科，擺在眼前的事實，是無綫近年製作無料到，被人鬧爆，行政主席梁乃鵬唯有重拍經典劇，爭取時間給編劇組緩衝。對此，曾在無綫拍過不少神級劇集的甘國亮回應說：「呢個論點唔成立，如果要拍，大把嘢可以拍，俾人鬧就摷番以前啲嘢拍，咁唔等於你拍以前嘅嘢就會好喎！（翻拍《無雙譜》你有冇意見？）我唔關心佢哋（ TVB）做啲乜，佢哋唔係做咗啲值得我關心嘅事，不過佢哋拍得番先算啦。」
市民有責任
對政府發牌，甘國亮反而有意見。「兩個電視台都咁難經營，政府仲發多兩個，市場係咪可以容納到先，市民唔會關心呢啲，媒體有責任解釋囉，但我從未睇過有文章研究過呢點。試諗嚇，多咗三奶四奶都搞到屋企咁亂，仲話點解唔俾五奶入宮？
「淨係話佢哋啲劇唔得，咁你又睇？眾志成城話熄電視，又唔見有數據喎？咁嗰晚（網民發起熄電視日）到底影響咗幾多呢？又唔講喎！你哋試嚇一晚唔睇，收視跌 50%，佢哋都吊得頸啦，仲點證明俾廣告客戶睇係冇事，佢哋攞個牌係賺錢，有人鬧就做，咁抵鬧啦，但鬧人都要令自己得益先得㗎，唔好慳番啖氣。
「你日日都話間餐廳唔好食，但你日日都食，呢種先係令到佢哋（無綫）故步自封嘅原因！飯就話唔可以唔食啫，電視唔睇唔會死啩，咁你哋仲睇？咁係咪市民嘅責任先。」
王晶贊成
至於正與無綫合作搞劇集的王晶，對於翻拍經典劇集作緩衝亦表示贊成：「呢個都係一個好方法。」有指翻拍《流氓皇帝》用馬國明飾演當年鄭少秋朱錦春一角，王晶說：「俾我都會揀佢。」而李司棋飾的易蓉蓉，他則提議用鍾嘉欣，「氣質好適合。」
|
鍾意就快D Share啦！
|
|
|
