探熱針
撐三太唱東華 超蓮空運吳克群
何鴻燊三太陳婉珍今年四月升任新一屆東華主席後，為省靚由她揸旗的慈善籌款節目《歡樂滿東華》，除了剔走去年被投訴灑鹽花的表演環節，又出動三房仔女助陣，其中超蓮男友吳克群，更由台灣飛香港做特別嘉賓；為了讓有工作在身隨時遲大到的吳克群順利現身《東華》，三太已下令私人飛機 stand by，候命出動。
超雲整蛋糕
去年的《歡樂滿東華》只得十九點收視，陳煒帶頭領跳的肚皮舞更收到多宗投訴！新上場的三太唔想失禮，落手落腳參與構思節目內容，又徵用三房子女負責其中一個環節，超蓮男友吳克群亦接令飛來港，跟女友同台演出。
「三太本來想搵克群同超蓮合唱，諗住有 noise可以幫東華籌多啲錢，但克群一直抽唔到時間練習，為免效果唔好，最後放棄合唱。三太自己落場幫手度節目內容，叫超雲整蛋糕又叫埋唔鍾意出鏡嘅猷啟表演，而克群今次嚟香港嘅酒店同機票費用，都係三太自己俾，出錢又出力。」知情者說。
私人飛機候命
據了解，《東華》當日要在台灣為模特兒比賽做評判的吳克群因為撞期，最初亦不敢一口應承來港為未來外母造勢。
「克群做評判要坐到尾，個模特兒選舉要四點半先完騷，佢飛到嚟香港要八點，如果遇到塞車仲難控制，個騷一早接落，又好難突然甩底，所以克群都冇即刻應承㗎；但三太好想有呢 part節目，於是叫秘書安排定私人飛機 stand by，萬一有任何差池，克群都可以坐佢架私人飛機過嚟。」
廿萬一位
何鴻燊家族旗下私人飛機公司 Jet Asia，現時大概有十一架飛機，其中八架出租用，部分不外租的私人飛機，則供何家各房使用。三太為吳克群安排的私人飛機，由台灣飛香港費用約二十萬港幣，好濕碎。
自己人看待
吳克群與超蓮拍拖兩年多，一直深得三太歡心；尤其同超雲的陳山聰比較，不會一味靠黐的吳克群，絕對加滿分。
「克群喺大陸唱騷，三首歌都收五十萬人仔，而家又有埋自己品牌時裝店，相比起陳山聰唔做嘢又開口問超雲攞錢搞時裝，三太自然識秤，今次佢仲專登要呢個未來半邊仔嚟做《東華》，真係當佢自己人啦！」知情者說。
|
鍾意就快D Share啦！
|
|
|
