探熱針
3000萬賣身 許志安發誓養 Sammi
情路兜轉 23年，許志安終於在 Sammi 41歲生日（ 8月 19日）當天求婚成功，十一月底還秘密到峇里島行禮，由於怕喜事張揚，二人未有在當地註冊。成功感動身家億億聲計的天後下嫁，許志安向身邊好友透露：「唔會使老婆一毫子！」
坐言起行，原來安仔已經鋪定路，下月中便會離開合作九年的寰亞唱片，收 3,000萬轉會到太陽城娛樂，跟 Paco黃柏高再合作。
老婆本到手，安仔計劃買樓俾 Sammi揸手外， 2014年舉行的世紀婚禮，所有大小開支，同樣男子有責，由安仔全包！
過百親友見證
復合兩年多，許志安早已視 Sammi為結婚對象，但對方一直抗拒一紙婚書，未肯步入教堂；直至今年八月， Sammi四十一歲生日，安仔出動鮮花、鑽戒加跪地求婚，最終打動女友答應做許太。
求婚成功後，安仔再秘密安排峇里之旅，請齊 Sammi及雙方家人至親等接近百名親友，參加慶祝 party。
「安仔親自揀場地，環境布置全部一手一腳安排好曬，其實當日佢哋有行婚禮儀式， Sammi都感動到眼濕濕，但安仔就喊得好犀利。而家成班親戚都改曬口，叫 Sammi做『十嫂』、『十姑奶』、『十舅母』、『十伯娘』，佢哋兜兜轉轉廿幾年，最終可以喺埋一齊，大家都好感動！」安仔好友說。
包起 Sammi
一直被指女尊男卑，雖然彼此身家有距離，但安仔吸金能力都唔弱，除持有的二千四百萬幹德道單位，他亦計劃好婚後繼續努力賺錢，買層樓送俾老婆揸手。
「雖然 Sammi樓又多錢又多，但安仔講到明點都唔會使 Sammi一毫子，上次峇里島行禮，機票、住宿所有使費都係安仔負責，之前佢同 Sammi去旅行，就算係買衫 shopping，安仔都出曬錢，佢覺得呢啲係男人嘅責任！」知情者說。
半年前已鋪定路搵老婆本。下月中與林建嶽旗下的寰亞唱片結束九年賓主關係，並以三千萬轉會費過檔 Paco黃柏高的太陽城娛樂。
「安仔同 Paco感情好好，就算之前轉咗會，兩個成日會約出嚟食飯，安仔好多事都會向 Paco攞意見。 Paco去咗太陽城之後，一直都想簽番安仔，今次跟番 Paco，安仔一次過袋咗三千萬，佢話希望可以再衝刺，要賺多啲錢養老婆！」
有共識一齊住
即使快將結束賓主關係，但寰亞唱片仍努力為安仔爭取樂壇大獎，在剛舉行完的新城頒獎禮獲得多個大獎外，也是他喜訊曝光後首次見傳媒。
天後老公在頒獎禮慶功宴上，被傳媒包圍追問求婚過程。安仔雖然答得有所保留，但全程展露幸福笑容，「嗰晚佢生日，咪試嚇囉！所有人做嘅嘢（鮮花、戒指、跪地）都有做！」至於與 Sammi同住，安仔表示：「係有呢個共識，大家一齊生活！」
離合 23年
Sammi與安仔早於華星年代已撻著，其間離離合合 23年，終於修成正果， Sammi正式成為安嫂。
91年 撻著
二人分別參加新秀並簽約華星唱片，被公司安排以情侶檔合唱《其實你心裡有沒有我》撻著。
92-99年 熱戀期
經常被踢爆到日本旅行，並分別以另一半姿態現身對方演唱會撐場。 98年安仔母親去世， Sammi被拍得在靈堂飲泣； 99年 Sammi開演唱會時突然停電，情急下大叫「安仔」，安仔即飛撲上台安撫。
02年 廚房宣言
在 02年的《勁歌金曲》頒獎禮中，二人同時奪得最受歡迎男、女歌手，安仔在台上喊住發表「廚房宣言」， Sammi在台下感觸落淚，場面感動。但事隔唔夠半年，兩人突然分手。
04年 撻著助手
回復單身，安仔與助手「細佬」撻著， 07年安仔父親過身，「細佬」更以家人身份戴孝在場打點。
|
鍾意就快D Share啦！
|
|
|