寶麗金小花婚姻生活迥異 王馨平蹺實老公曬幸福
【灣仔】寶麗金小花黎瑞恩同金利來三少曾智明最近傳出婚變，相反同係寶麗金出身嘅王馨平同老公仍然恩愛。雖然當年因父親反對而被迫同鄭嘉穎分手，但佢喺01年嫁畀金融富商李家輝後，一直過住幸福嘅少奶奶生活，直至近年歌癮發作，王馨平喺老公嘅支持下復出開演唱會兼出碟，佢喺嚟緊嘅農曆新年仲會為「盛．載．愛傷健慈善音樂會」演出，工作同婚姻生活同樣得意。
前晚王馨平同老公李家輝喺8點幾現身灣仔星街，同行仲有一名圈外男友人，佢哋走咗去PizzaExpress食飯。食飯期間，王馨平好開心咁同男友人猛咁傾，反而佢老公多數做聽眾，間唔中仲幫佢哋斟酒添飲，佢哋幾個越坐越開心，仲叫多一支香檳繼續傾㖭！
■王馨平同老公李家輝（右）01年結婚，至今仍然恩愛，前晚兩公婆一齊出動陪個男性友人食飯。
■王馨平兩公婆食完飯散步，期間王馨平仲蹺實老公㖭。DV圖片
DV圖片
一個講一個聽
直到9點半左右，三個人食飽飽走人，臨行前王馨平同男友人講多兩句先拜拜，跟住就同老公散步，沿途見到佢兩公婆邊行邊傾，雖然冇乜親暱表現，只係行到轉角位，王馨平就情不自禁蹺住老公隻手繼續行，女嘅邊行邊講，男嘅邊行邊聽，成個畫面覺得佢哋好有默契兼老夫老妻嘅感覺。
採訪、攝影：黃曉程、羅德光、陳辰
■黎瑞恩同老公曾智明最近傳出婚變。資料圖片
■王馨平同男性友人講不停，佢老公李家輝（左）就幫佢哋斟酒。
■王馨平同友人（左）握手講再見。
|
鍾意就快D Share啦！
|
|
|