周慧敏相隔17年再出碟 未收到基仔婚訊
2014-02-24 22:39:00
今晚英皇春茗晚會上，出現咗一位特別嘉賓，要由容祖兒及古巨基介紹呢位嘉賓上台，祖兒先話：「我哋都係女仔，係靚嗰隻。」基仔就話：「你哋都係女神。」祖兒再講：「我哋著起宮廷服，大家身材都好好。」基仔聞言笑指：「見仁見智啦﹗」之後身穿粉紅色one piece裙嘅周慧敏（Vivian）靚爆出場，基仔賣口乖話 ：「女神中嘅女神，玉女掌門人。」
Vivian將與英皇唱片合作推出福音碟，司儀洪傑又問Vivian想唔想同其他歌手合作？佢話：「希望大家畀多啲意見我。」祖兒就話：「你隨時打畀我，當自己屋企。」
原來Vivian自從1997年後，到0依家都冇出過新碟，佢唯一想出嘅係福音碟，希望為佢信仰做番一件事。而今次促成合作，係多得基仔拉攏，基仔話識咗Vivian好耐，知佢有呢個構思，所以幫佢傾。
而Vivian受訪時表示一直有留意邊間唱片公司有出福音碟嘅經驗，亦同經理人Lorraine傾過，加上英皇有唔少基督教歌手，亦有好多老拍檔，Vivian希望今年內完成project，會以流行曲式為主。
問到係咪見到鄭秀文唱福音碟，可以搞到咁大眾化而引起興趣？Vivian表示：「好多基督徒藝人都會係肢體互相造就，佢（Sammi）都有祝福我。」
咁會唔會搵老公倪震填詞？佢話：「佢唔熟音樂，唔打搞佢，到我寫歌詞時，會搵佢畀意見。」
基仔同Lorraine屢爆婚訊，問Vivian有冇收到風？佢話：「自己未有收到任何邀請，自己唔八卦，如果佢哋主動講我先會知，若果真係發生件事（指結婚），我會非常開心，因為我暗地裡期待咗好耐。」另外，Vivian亦表示近日有陪老公追睇《來自星星的你》，Vivian表示作為藝人都要了解下呢部熱爆韓劇，佢大讚該劇可以去到咁高水平。
不過Vivian就話未收到基仔結婚消息。
周慧敏相隔17年再出碟，今次同英皇合作出福音碟，並由好友古巨基負責拉攏。（攝影：陳順禎﹑陳慧安）
古巨基再傳婚訊，周慧敏就暗地裡替對方歡喜。
好靚呀﹗
|
鍾意就快D Share啦！
|
|
|