保鑣遮囝囝
周一（ 24日），李嘉欣又親自接小 JM放學。當日太陽猛，愛美的她寧願叫啹喀保鑣遮囝囝，愛子程度可見一斑。
滾熱辣
許晉亨教棋 學三文四語 李嘉欣打造全能 B
李嘉欣寶貝仔 Jayden（小 JM）是許世勳的嫡孫，許家資產高達 124億，小 JM去年已開始返港島區頂級幼稚園維多利亞的學前班，但從未被傳媒影過。皆因李嘉欣雖然經常接送囝囝，但會先吩咐同行的啹喀保鑣視察四周，確保沒有記者才會現身。
加上接送囝囝的車日日唔同，除了七人保母車、 Audi房車外，有家長更見過小 JM坐 4百萬藍色賓利返學，認真架勢堂。
唔講唔知，小 JM遺傳了媽咪的語言天份，對文學及外語一學就曉，三歲已經識三文四語，除了日常對答的英、粵語外，還略懂國語及日語。李嘉欣卻強調不會做怪獸家長，還說︰「佢瞓覺緊要啲！」
一連幾天，本刊發現小 JM返學都頗大陣仗。 19日早上，小 JM在幼稚園放學前半小時，一名啹喀保鑣已先在學校對面的陰暗位駐守。到正式放學，戴上黑超的嘉欣與菲傭在啹喀保鑣護送下入學校，接小寶貝放學。
嘉欣見到兒子後，臉上立即出現笑容，小 JM即奔到母親面前撒嬌。兩人邊行邊講，看得出感情很融洽。
唔見阿媽扭計
翌日，李嘉欣因為出席活動，未能接仔。女主人不在，兩名啹喀保鑣更打醒十二分精神𥄫到實。菲傭本來接了小主人就想嗱嗱臨上車，但小 JM見母親不在，即在學校門口扭計，不肯上車，擾攘一輪才被「請」上車。
嘉欣教番外語
據家長報料︰「次次見到李嘉欣接囝囝都唔同車，最記得係嗰架得數目字車牌嘅藍色賓利。佢雖然好少同其他家長傾偈，但見到面都會點頭笑嚇！李嘉欣個仔 Jayden都好有禮貌，見到人會 say hello、 say bye，仲好活潑，成日跳跳紮。佢喺班裏面幾受歡迎㗎！」
李嘉欣除了為囝囝安排讀名牌幼稚園外，亦對囝囝美術及體育方面戮力栽培。「依家名校學位爭得好犀利，雖然小 JM 8月至讀 K1，但 Michele（李嘉欣）已經做足準備工夫。 Michele自己都係名校瑪利諾書院出身，當年會考 2A7B，加上中、英、日、法、葡同上海話都了得，語言方面佢自己教番，因為佢想同個仔傾多啲偈。
「其實許晉亨就想囝囝讀國際學校，近排佢成日親自教 JM捉國際象棋，都係想方便個囝可以融入呢啲學校。但 Michele就一心想佢入男拔，更打通天地線，要入男拔都可以話冇難度。不過，自從 Jayden返學後，嘉欣亦有感個仔個性較好動，怕個仔未必適應傳統學校，依家仲考慮緊。」
上周四，出席活動的李嘉欣，與本刊記者大談湊仔經時，亦表示未揀定學校︰「應該唔會係最傳統嗰種，太多功課又可能好多背誦，睇佢我都唔想佢個童年將學習變成一件好有壓力嘅事。（會唔會接送返學？）都會嘅。」
囝囝愛繪畫
日前，本刊亦發現小 JM在花園道上興趣班。問到點樣為小 JM揀興趣班，嘉欣表示以囝囝的喜好為主。「多數都係運動嗰啲，我覺得可以散發下佢嘅精力，個人 mobile（活躍）啲。其實對比以前，依家啲小朋友學習係多咗，但唔會安排得太密，佢瞓覺緊要啲！我覺得佢對顏色較有興趣，每個小朋友都可以做一個小藝術家，但話佢特別有天份，就未發現到，只係佢好鍾意粉紫色同唔同嘅彩色。佢試過畫過一隻潛艇，係有人教，等佢對顏色敏感度高啲，然後俾佢自己發揮。佢都畫得幾得意！」
李嘉欣亦承認，小 JM太黐身，不太喜歡她工作。有次出席完活動，囝囝更試過對她黑面，所以她現在亦會減少工作遷就︰「依家離開佢十日係極限，我諗學齡前佢需要倚賴我，遲啲我想黐佢都未必有機會。（係咪每日都會攬住你撒嬌？）都會，哈哈……但都唔係每一日。」
5車輪住用
為咗避開眾人耳目，有至少五架車會用來接送小 JM，呢位小朋友認真架勢。
日產七人車
李嘉欣要開工，湊小 JM嘅責任有時就交俾嘉欣家姐李嘉明。早前李嘉明就出動私夥日產七人車接上完興趣班嘅小 JM。
9成升 BAND 1 明星名人爭報
2月才 3歲的小 JM，在維多利亞幼稚園就讀小組班（ nursery），今年暑假後才升上 K1。他所報讀的國際班每月學費$5,330，學校採用兩文三語教學。去年此校的學生有九成多可升讀 BAND1小學。
維多利亞教育機構在港設有 1間中學、 1間小學， 11間幼稚園及幼兒園，而銅鑼灣維多利亞國際幼稚園更通過認證，成為國際文憑（ IB）的世界學校，方便小朋友將來到外國讀書，唔怪得李嘉誠個孫女、甘比女兒及陳奕迅女兒康堤都報讀此校。
練到文武全才
自言並非怪獸家長的李嘉欣，表示唔會太過逼小 JM。據悉現時小 JM每星期去兩個中心返興趣班。周末李嘉欣會堅持 family day，同囝囝 relax一下。
學美勞
每星期小 JM都會到 Kids' Gallery兩日，分別上「溝通技巧」及「手工藝」課程。兩個課程每周上一堂，每 8堂收$2,200。
為湊仔刨書
為了教育 Jayden，李嘉欣近期不時睇兒童書，更睇多了心靈書籍，務求令自己做一個滿分媽媽。
《我的感覺》系列
包含「生氣」、「害怕」、「忌妒」、「難過」、「思念」，以及「自信」與「同理心」七大主題。故事以小動物為主角，透過文字及圖畫，教導小朋友如何排解情緒。
|
鍾意就快D Share啦！
|
|
|
