[忽然1周 974] 恐加息拖累 栢芝急返港劈價賣樓 MW,

周三（ 26日）栢芝出席名牌慈善晚宴，心情唔錯，左擰右擰，但就死都唔肯接受訪問。唔通驚人問佢係咪返港撲水？

媽咪姐

恐加息拖累　栢芝急返港劈價賣樓

同霆鋒離咗婚嘅栢芝，舊年帶住兩個仔 Lucas同 Quintus移民新加坡，閒時喺當地滑水、做義工打發時間。眨眼一年，對娛樂圈一直未死心嘅佢近日開始「復出」，前幾日專登返港幫商台節目《起來！大龍鳳》造勢。媽咪姐仲收到風，栢芝今次返嚟，原來有一個「秘密任務」！

話說早排美國聯儲局向外界「放風」暗示會提前加息，點都會影響香港樓市。向來鍾意買磚頭保值嘅栢芝，三年前以 1.28億「摸頂價」買入中半山老牌豪宅世紀大廈頂層單位。講真，即使霆鋒有俾贍養費，但栢芝依家收入唔多，又要供幾層樓同養仔，梗係驚冧市

栢芝以暗盤放售世紀大廈 2座頂層單位，由女助手開門俾經紀帶客睇樓，非常低調。

栢芝以「便利捷」公司名義，喺 2011年 8月以 1.28億買入世紀大廈單位，而佢喺公司註冊資料中，就報住舂坎角 Ocean Bay，即係佢一直唔俾霆鋒賣嘅舊愛巢。

前幾日，有個做地產嘅老死八俾媽咪姐聽，話栢芝早兩個月通知相熟經紀，打算以暗盤兩億出售世紀大廈。不過佢眼見美國就快加息，擔心間屋跌價，所以上個禮拜未返港前，急急補多個電話俾個經紀，自動減二千萬求售。栢芝開價二億嗰陣，由於屬「癲價」關係，根本無人問津，直至上個禮拜降價一成之後，終於有兩個大客去睇樓。地產老死同媽咪姐講：「依家個市唔同兩年前政府未出辣招嗰陣咁好景，張小姐揸貨三年就想賺六千幾萬，我哋班行家聽到都 O曬嘴啦。佢減價一成其實都未貼近個市價，之前嗰兩個客睇完樓冇曬下文就知」

上周五，栢芝戴曬口罩低調返港，仲叫一男一女友人先帶 Lucas同 Quintus上車，又玩調虎離山。但你們這一家咁易認，好難見唔到囉！

高調撐釗鋒

明明上周五驚死人知自己返香港，但周日（ 23日）栢芝就著到成身螢光黃去撐傳過緋聞嘅 C AllStar主音釗鋒，睇騷又入後台，手臂仲有 C All Star假紋身㖭！

賣樓事小，今次栢芝又帶住兩個寶貝仔返港，讀緊小學一年級嘅 Lucas，又做逃學威龍陪媽咪周圍走。就算賺到錢，栢芝都補唔番啲讀書時間俾個仔喎！

霆鋒唔想理

栢芝返香港賣樓又開咪講婚姻，前夫霆鋒就一於少理，日前佢同拉姑食飯，聽到記者提「栢芝」二字，即刻笑笑口話：「係咪想死呀？」擺明唔想理前妻任何嘢，而拉姑呢？咪淨係掛住排期見兩粒寶貝孫囉。

阿仔萌爆網

無論你點睇栢芝，佢應該好錫兩個仔。事關 Lucas同 Quintus成日都開開心心，可愛到爆！近日網上就瘋傳佢兩個講 hello嘅片段，見到 Quintus邊講邊笑，真係好想偷錫佢囉。

鍾意就快D Share啦！

下一篇 》