[忽然1周 974] 歌星相•念耀榮叔 MW,

媽咪姐

歌星相•念耀榮叔

人稱「演唱會之父」嘅張耀榮，周二（ 25日）淩晨因心臟病發猝逝，享年 82歲。縱橫紅館三十年嘅耀榮叔，幫過唔少紅星開騷，亦幫過唔少新人圓夢，賺蝕冇計。耀榮叔喺訪問中，曾經講過呢盤生意令佢蝕咗足足兩億， 07年更被法庭頒令破產。

其他影片： >>張耀榮寓所猝逝　藝人大嘆不捨之情

人生大起大落，但熱愛娛樂事業嘅耀榮叔，從冇放棄，就算上咗年紀，憑貪玩性格，就連細佢五十年嘅 Twins、 Joey都可以同佢打成一片，城城、 Eason更加嗌佢做老頑童。難怪其死訊傳出後，唔少歌手藝人紛紛悼念，盼他一路走好！

阿 Sa：佢好精靈

Twins第一個演唱會由耀榮叔幫手搞，對佢離世，孖妹感觸良多。阿 Sa說：「最後一次見到佢係年初祖兒演唱會，見佢仲係好精靈可愛。當時佢仲問我哋 Twins幾時再開演唱會，我答佢唔夠信心，耀榮叔就拍心口話佢俾我信心！」而阿嬌就話：「耀榮叔實際上係一個老頑童，好活潑鬼馬。耀榮叔，希望你喺另一個世界過得更好！」

Joey：難忘 give me five

容祖兒感激耀榮叔一直嘅支持同鼓勵。佢喺微博話：「我每次開騷，您每晚都會嚟打卡，你唔單止嚟，而且仲會好用心去欣賞每一場表演……最後一場（演唱會），我狀態回勇，您興奮得同我 give me five，當然仲有我哋最鍾意嘅跳起嚟影相，耀榮叔，一路走好。」

Eason：我好尊重佢

見親耀榮叔都好肉緊嘅 Eason，亦好唔捨得呢位老頑童。「張生係一位我好尊重嘅前輩，佢對樂壇作出好大貢獻，希望佢安息，佢家人節哀順變。」

城城：希望建立銅像

身在北京拍電影嘅郭富城，知道耀榮叔走得突然，坦言心痛難過。城城希望政府能夠考慮為張耀榮喺星光大道建立銅像，以表揚佢對樂壇嘅貢獻。

安仔：佢係我恩人

試過喺演唱會記招，跪地向耀榮叔斟茶嘅許志安坦言：「佢由我 96年開『男人最痛』演唱會，到最近個唱都係佢幫手搞，可以話係我恩人。印象中佢好玩得，好慈祥，我會永遠好掛念佢。」

黎明：懷念呢位長輩

黎明同唔少歌星一樣，第一個紅館騷交俾耀榮叔搞。對於耀榮叔逝世，黎明表示：「相信每位同張生喺紅館合作過開演唱會嘅歌手，都會對呢位長輩好懷念，大家唔會忘記張生對香港演唱會帶嚟嘅貢獻。」

鍾意就快D Share啦！

下一篇 》