千嬅露半球 篤老公背脊：成日話我肥 又話我行得衰
2014-03-24 20:32:00
理解到千嬅嘅「打底」構造呢？ (攝影:陳慧安)
講咗咁耐，今日於會展舉行嘅香港影視博覽，終於輪到彭浩翔執導新片《香港仔》。古天樂、吳孟達、蔡潔、吳嘉麗、楊千嬅、梁詠琪等齊齊亮相。
千嬅以連身長裙出現，疑似露南半球，問佢係咪真空露半球啫？佢話:「新奇士橙咩？我當然有打底，打曬底黐曬嘢0架喇!」佢又話老公冇話禁止性感，最重要係靚唔靚，唔肉酸。佢又話老公成日笑佢:「話我行路行得好衰，似差婆，叫我行得靚啲。咁我個人心急嘛，不過我都覺要優雅啲。」佢仲話丁生成日話佢肥喎。
問番佢丁生有何缺點？千嬅笑言:「佢話佢十全十美，全部都正喎，點會有缺點？」即係點？「佢食嘢好心急，一食完就埋單，我都未食完，每次好趕，唔知趕去邊。又成日叫我減肥，自己又唔減。」
聽講GiGi梁詠琪恨B，仲睇埋中醫求子，千嬅話:「佢好似ready，最重要有休息，relax下，佢都好似有planning。」千嬅仲話唔介意演媽媽角色，最緊要係駕馭角色，演員有好多可能性。」
至於GiGi呢，甫受訪記者即連聲恭喜，佢話:「唔係呀，我有肩周炎，痛死我，所以睇中醫，你哋太敏感。多謝大家好意，我都想快醫好，因要去中國唔同城市宣傳。」
GiGi又話睇中醫時都有順道調理身子，咁心唔心急想生B？佢話:「我都算遲婚，預咗不會一結就有，因為年齡問題，大家屋企都明白，等自然發生。」至於會否學陳慧琳咁用人工受孕？GiGi表示:「屋企人冇討論過，要克服心理上先，要同家人商量。而且我只係結婚兩年左右，啲人話通常三四年先有，唔心急。」佢又話患上肩周炎需要老公幫佢搲，令兩口子更加親密呢。
《香港仔》強勁陣容
|
鍾意就快D Share啦！
|
|
|