隱形影壇大亨
你以為古天樂只係客串《金雞 SSS》一角？原來佢先係背後科水嗰個老闆，部戲咁收得，最開心嗰個一定係君如同古仔
真面目
有錢途 《金雞》《豪情》科水 撈埋後期 古天樂搶霆鋒生意
近年拍到手軟，唔憂冇戲開嘅古天樂，主職拍戲搵銀外，原來私底下仲有另一條財路繼續錢搵錢。
據知 43歲古仔一直不滿足於只當演員，更大發圍想過老闆癮，兩年前開始，先入股好友的製作公司，今年初更撈埋後期製作；咁都未算，古仔更出埋錢開戲，包括《逃出生天 3D》、《掃毒》、《 3D豪情》和《金雞 SSS》，其中《豪》和《金》，更是古仔千萬揼本。
本刊得悉，古仔眼見霆鋒的「朝霆」賺大錢，他亦唔執輸發大後期製作公司運作，鬥搶生意。
古仔投資的 4套港產片中，《逃出生天 3D》和《掃毒》投放了成本約 20%，兩套所得一蝕一賺打個和。揼錢揼上癮，古仔再以 1,500萬和 1,200萬全數投資《 3D豪情》和《金雞 SSS》，《金》帶來 4千萬票房賺到笑，雖然《豪》片仍未上畫，不過據知古仔信心十足，同時間連後期製作都撈埋，認真有生意頭腦。
想變星爺話曬事
「古仔拍咗咁耐戲，佢一直都想好似星爺咁多方面發展，佢 12年入股咗個 friend間製作公司，今年 1月索性開多間專做後期嘅製作室；佢開公司好低調，行內唔係好多人知，之前君如要開《金雞》，古仔肯客串仲畀埋錢，拎咗 1,200萬；而《 3D豪情》就 1,500萬。」
據知，《豪》片原先由太陽城集團最大投資，監製陳慶嘉只想找古仔客串一角，但由於古仔看過劇本後很鍾意，即與太陽城斟洽買下整個劇本兼做埋投資者。「太陽城最初諗住叫何超夾番份都慳番！」知情人士透露。「古仔想開埋後期製作，其實係眼見霆鋒間公司撈得咁掂，幾乎獨市生意咁滯，古仔梗係想試嚇爭食呢嚿肥豬肉」
據知古仔買下專做以 CG特技聞名的公司 Fat Face Production Limited，和老闆吳炫輝現各持 50%股份；而公司過往負責過《寒戰》、《太極》、《維多利亞壹號》、《十月圍城》等電腦特技。
杜 Sir：我又唔係佢老豆
有生意頭腦，都要有拍檔，最近古仔連合作無間嘅杜琪峯都睇中埋。「古仔同杜 Sir一路合作過好多電影，兩個仲簽埋合作協議，杜 Sir知道古仔要揾地方做製作公司嘅 office，即刻二話不說畀公司大廈嘅低層單位佢用，古仔將新 office命名為『 One Cool』，襯番自己個名，仲專登整咗間獨立放映室畀公司後期製作用。」
古仔投資電影方面逐漸上手，一旦睇中目標就會出手，好似無綫和蕭定一合拍的《衝上雲霄》電影版，不單有份參與演出，仲揼本投資埋一份。本刊週一（ 3日）致電杜琪峯，問到古仔開設後期製作公司一事，他說：「我又唔係佢老豆，點知咁多嘢！（樓下畀咗佢用？）同事負責，我只知嗰度裝修緊。（分咗 1,500股銀河海潤畀古仔？）呢啲咁私人嘅嘢，唔答！」一查冊就見光
秘密大茶飯
古天樂撈埋電影後期製作，眼見呢行有霆鋒嘅「朝霆」作為最大敵人，古仔表現相當進取，先係買入以特技聞名行內公司 Fat Face Production一半股權、再開設新的後期製作公司，咁大嚿肥豬肉，梗係要明刀明槍同霆鋒爭過！
14年 1月，古天樂緊接開設了一間新的後期製作公司，話曬要同一哥霆鋒爭飯食，梗係要做足功課。
杜琪峯和古天樂私交甚篤，去年初古仔亦入股了杜 Sir以自家品牌銀河和國內海潤合組的經理人公司「銀河海潤」；而杜 Sir一聽到古仔搵地方開 office，即刻拍心口畀咗低層單位古仔用，認真老友。
|
鍾意就快D Share啦！
|
|
|