放狗減壓
這兩年羅霖因離婚及贍養費糾紛與前夫劉坤銘對簿公堂。平時除了湊仔外，她也會借放狗減壓。難得拋開煩惱，她在沙灘上與愛犬玩得不亦樂乎。
滾熱辣
搓胸防墮再覓第二春 50歲羅霖：佢要養得起我！
羅霖宣布與劉坤銘結束 16年婚姻，曾為贍養費問題爭拗不休，最後官司庭外和解，雙方再無錢銀轇轕，現時羅霖與細仔搬回深井娘家生活。
少奶奶頓變失婚婦，羅霖逆境求生，惟有出動隱藏多年的魔鬼身材，殺入影圈大膽演出，更以半百年紀，獲得「美魔女」稱號，人氣有增冇減。
日前，本刊直擊羅霖到沙灘放狗，穿上兩件頭運動裝的她除白滑肌膚非常養眼外，堅挺的 33D無疑係人間「胸」器。曾形容與劉坤銘這段婚姻是噩夢的羅霖，仍相信愛情，「最緊要係大家相愛，但呢個社會好現實，我都想對方有經濟能力，養得起我……」
屬龍的羅霖年近 50歲，空姐出身， 91年當選亞姐冠軍並奪最完美體態獎， 96年與拍拖 5年富商劉坤銘結婚，但皇妃般的生活只能維持 16年。
很多女人都視家庭為終身事業，對失婚羅霖來說，曾經亦有如此想法，無奈要行到離婚這一步，不單失去人生依靠，破碎家庭亦影響三名兒子。羅霖說：「其實當年我要嫁劉坤銘時，成班姐妹都有啲人唔係咁支持㗎！但我話曬都同佢拍咗 5年拖，對方又好愛我，所以先博一鋪。其實嗰時都有其他人追，比劉坤銘有錢有地位嘅大有人在，但女人唔一定注重物質方面。當時嘅我已經好滿足，婚後我都唔使再做嘢。」
不少選美出身的女星嫁入豪門後，名下隨即增添不少物業及資產，但羅霖至今仍兩手空空。據知，羅霖曾與劉老爺約法三章，承諾在老爺在生之年絕不會與劉坤銘離婚，方可獲得劉氏家族一個物業。最終羅霖沒有為錢低頭，兩年前決定向劉坤銘主動提出離婚。但勇氣過後，她卻要承受精神上的壓力。
為部戲去到盡
兒子成精神支柱
早前，羅霖被劉坤銘反索每月五位數字的贍養費，令她跌落人生谷底。「我哋分開咗兩年，法庭批咗暫准離婚書，三個小朋友共同撫養，判咗全部跟我，但因為佢（劉坤銘）唔租屋俾我，所以我只可以同細仔一齊返媽咪度住。我哋係庭外和解，但對方仲未肯簽某啲文件，其他細節唔可以透露。我依家壓力真係好大，已經連續多晚失眠。每朝 6點起身同細仔一齊食早餐，送佢返學，已經成為我嘅精神支柱。」曾經愛情至上的羅霖，最初連自己亦接受不到離婚，頭半年因為壓力問題令體重跌至得雙位數，自信亦降至零。
嫁入豪門 16年，羅霖外表風光，實質卻無樓揸手。離婚後打回原形的她，與細仔搬到母親名下位於深井的海韻臺居住。
夫家變陌路人
「我唔後悔嫁佢，大家係真心相愛過。結婚當然係想白頭到老，但去到性格不合忍痛提出離婚後，佢嘅態度即時唔同曬，連佢啲屋企人亦冇再搵我。生細仔後我先發現佢嘅問題，如果唔係出現咗導火線，我都會一直忍落去。」關於羅霖的離婚真因，外界眾說紛紜，有指劉坤銘早年因金融風暴致生意失利， 00年遭債主入稟申請破產。亦有報道近年劉經常往返內地投資，身邊不時有女子相伴，夫妻感情愈來愈淡。更有傳劉坤銘在一次夫妻爭拗時向羅霖「鬱手鬱腳」。
曾經傷過痛過，現實令她不能不為自己著想，亦希望有朝一日可接回另外兩個兒子共同生活，「我當然想搵番個伴啦，最緊要大家相愛。但呢個社會好現實，我都想對方有經濟能力……最理想係我唔使做嘢，佢養得起我，可以照顧到我同囝囝。但我知道一定會有困難，我年紀唔細，又係一個離咗婚嘅女人，仲有三個仔，就算對方肯，佢屋企人都未必接受到。講真，連我自己都接受唔到自己個仔娶個離婚嘅女仔，所以冇男人會要我。睇下我有冇咁嘅福氣，好唔好命。即使搵唔到（男人）都冇遺憾，因為已經有最壞打算。」
護胸有法
離婚後羅霖沒有自怨自艾，除了努力搵錢外，堅持每日護理身上每吋肌膚。雖然記者眼見她手部青筋微現，但身上肌膚白滑，確不失美魔女稱號。「皮膚對女人好重要，每日沖涼後我都會全身塗護膚乳，每月定期做兩至三次人手推脂推淋巴。胸部由於生仔時每次都餵人奶到半歲，當時都升咗兩、三個 cup，依家上圍比以前大咗。但年紀問題，加上地心吸力，所以都會做啲加強胸部結實嘅運動，亦會每晚自己按摩。順便提嚇大家，女人就算瞓覺都最好戴個冇鋼線嘅棉質內衣，咁先可以保持形狀不變。」日前，本刊直擊羅霖於赤柱放狗減壓，身穿兩件頭運動衫，激凸上圍盡現，雖然肚皮有少許鬆弛，但對 50歲三子之母而言，她的身材已是人間極品。
健胸示範
訪問期間，羅霖即時分享多年的健胸秘技，她說每晚都會做這兩個動作，以及洗澡時按摩胸部，可令雙胸變得堅挺。（想睇清楚健胸動作，就睇片）
陶傑望羅再起跑
今次復出接拍題材露骨電影《愛．尋．迷》，羅霖坦言是被才子導演陶傑的誠意打動。而陶傑與羅霖合作過後，對其身材亦讚不絕口。問到有否開解過失婚羅霖，陶傑說：「有嘅，不過清官難審家庭事，羅霖咁純真，佢可能參透唔到囉！不過依家未為晚，起碼全港成熟又事業有成嘅男士都識得佢。我知好多都心生仰慕之情，希望佢搵到新嘅起跑線。」連才子都為羅霖打氣，看來失婚不等於失去所有。
美魔女當道
「美魔女」一詞源自日本雜誌，形容 35歲以上，看不出實際年齡已婚產子的女士。這個新詞出現後，在亞洲，韓國、台灣相繼出現「美魔女」，而年齡更上調至 45歲以上。香港娛圈不缺「美魔女」，但講到殿堂級，就非以下三位莫屬。
李美鳳 50歲
「電眼美人」李美鳳是一對龍鳳胎之母，日常飲食以養生為主，她表示飲食盡量少油少肉，每日午餐、晚餐都必定有魚，適量的運動加上優質睡眠，能保持皮膚白滑有彈性。
余安安 54歲
兩女之母的余安安，與女兒出街似姊妹多過母女。她堅持每日運動，日日敷 mask。飲食方面她亦有研究，買餸以少肥低脂高纖為主，令身體有正常的新陳代謝。
趙雅芝 59歲
最強「美魔女」非趙雅芝莫屬，驟眼睇根本無人估到她近 60歲。她強調均衡飲食，會親自調製新鮮面膜。身形方面，她每星期都會做三至四次帶氧體操。
|
鍾意就快D Share啦！
|
|
|
