關禮傑及張兆輝雖然同屬一隊，不過練波時都冇情講，一樣去到盡。
娛樂喧
貴過克勤 張兆輝 關禮傑 50萬人仔講世界盃
世界盃尚有兩個月才有得睇，不過張兆輝同關禮傑兩隻波牛就率先感受世界盃。兩位中生最近應內地央視邀請，飛巴黎踩入法國國家足球隊的訓練基地，拍攝世界盃節目《 Go巴西 Goal》做一集嘉賓，為比賽旁述半小時就各袋 50萬人仔，計落仲高薪過平均 16萬講一集的李克勤！
以往在大台做世界盃節目，主持、藝員每集只得數千，現在張兆輝與關禮傑做一集嘉賓，酬勞比大台高十幾廿倍，難怪個個北上掘金！
去年電視劇《神鎗狙擊》在內地點擊率逾 5億次，帶挈男主角張兆輝打開內地市場。而水頭充足的中央電視台，早前看準《爸爸去哪兒》熱爆，想拍攝一個世界盃版本的親子節目，更打算以千萬人仔找張兆輝父子到歐洲拍攝。不過張兆輝因為接了杜琪峯新片《華麗上班族》，加上兒子要返學而未能成事。
後來央視以張兆輝做膽，加埋關禮傑，將節目改為真人騷，名為《 Go巴西 Goal》，兩人作嘉賓評判，由參賽的球迷及內地明星與各國球員、球迷比拼球技及玩遊戲。上月尾，張兆輝及關禮傑抽五日時間，拍攝第一站──法國。
兒時夢想做球星
兩位波牛到達法國後，立即踩入法國國家足球隊的訓練基地，拍攝兩隊參賽者比試。張兆輝與關禮傑雖然只是評判，但亦有落場示範，同時為比賽做旁述，完全過足癮。
兩人熱愛踢波唔係得把口，上周三（ 2日）中午滂沱大雨，待兩點多雨停後，他們即趕落九龍灣踢波，兩人在球場上活力十足。
談到球技有番咁上下，張兆輝說：「搏命㗎！我係波精嚟，英格蘭是我情意結，邊個好波咪鍾意邊個，我鍾意守龍門嘅雲達沙，不過佢退咗休，今年就睇好巴西。雖然我做唔到朗尼或朗拿度，但今次去法國國家隊訓練場踢下波，都算實踐咗夢想（係咪世界盃迷？）世界盃幾年先搞一次，一定留意！（拍一集酬勞有 50萬喎？）酬勞 ok佢哋都好闊佬。」
再問拍檔關禮傑，對酬勞他一樣笑而不答：「我哋鍾意踢波嘛！最緊要有份參與世界盃，順便可以發揮我哋嘅普通話，哈哈。（有冇難度？）冇，我同張兆輝一齊去變咗有拍檔，大家都開心啲。其實都係宣傳世界盃，我哋係評判，間中會幫啲參賽者，都好輕鬆。今年我就捧德國隊，而球星我鍾意朗拿度。」之後記者向他們突擊發問世界盃問題，張兆輝答中九成，關亦答中六成，足證兩位波牛並非揸流攤！（詳情睇片）
以往為大台做世界盃節目，都係 30分鐘當一個騷計，藝員拍成個節目都只得數千元，嘉賓更加只有車馬費。與出手闊綽的央視相比，的確蚊髀同牛髀。難怪張兆輝講到明，稍後安排到時間的話，會再為《 Go巴西 Goal》做嘉賓
克勤最貴
香港電視台一向有請藝員、歌手講波，不過講出手一定冇內地咁闊綽。現時香港講波酬勞紀錄，以李克勤為 now講 2012歐國盃，有 800萬酬勞最高。但除勻 31場波，李克勤每場收 16萬，冇張兆輝同關禮傑咁高人工。
|
鍾意就快D Share啦！
|
|
|
