3,000本火速賣曬！
媽咪姐
偽文豪新書 再辣鎮宇蘇玉華
講到呢期最爆嘅，梗係由前 PA偽文豪出嗰本《 TVB血淚屎》本書出咗短短兩、三日， 3,000本全部賣曬，依家要快馬加鞭加印 6,000本（出版商話下星期有售）。厲害！媽咪姐我當然唔執輸啦，開售第一日即刻仆到去買本返嚟拜讀嚇！本書咁好賣，「豪仔」你真係要多謝 CCTVB㗎，人哋特登喺《東張西望》整輯「教育電視」出嚟平反，你直頭連宣傳費都慳番！
媽咪姐咪完成本血淚屎之後，發現除咗「唔唱 K」同「 Chok峯」之外，仲有兩單嘢未爆出嚟！話說偽文豪 09年拍緊《大冬瓜》嘅時候，俾導演要求轉陀螺影幾個 shot，點知佢轉咗幾次都轉唔起，劇中小演員一轉就搞掂，「然後後面一眾工作人員同蘇玉華姐姐又開始碎嘴﹕『大學生喎，真係冇鬼用！』」有網民讀者睇到呢段，狂插蘇玉華乞人憎，話抵佢半紅不黑！媽咪姐即刻就打俾蘇玉華求證嚇啦，點知佢一聽到呢單嘢就即刻話好忙，「唔可以傾呢個電話，趕住出門口」。
另一單呢，就係爆喺一班演員口中嘅「阿狼振乳」嘅醉酒惡行。「演員甲﹕『我梗係知佢躁狂，見過佢踢爆 K房道門啦，不過咁啱啲 Friend約我，佢 join埋，我都冇計。』」 Well，睇個名，好難唔令人聯想到「 Sam哥」吳鎮宇噃。可惜直到截稿前，鎮宇都未有回覆。我哋亦有致電偽文豪問「阿狼振乳」係咪就係「 Sam哥」，佢回覆：「如果我可以講俾你知，我就唔使用『阿狼振乳』呢個名」想睇呢位是非人物現身說法， click《話你知》〈金翅大鑊鳥 偽文豪〉
俾蘇玉華話無用
09年偽文豪話拍《大冬瓜》時，導演叫佢轉陀螺拍幾個 shot，點知佢唔識轉，即刻俾工作人員同蘇玉華寸。
爆狼振乳躁狂
偽文豪經常聽到明星不為人知的私生活，好似演員口中嘅「阿狼振乳」就會經常酒後躁狂。
網友力撐
因為 fb，偽文豪先有機會出書，而一班網友一直力撐，佢嘅 fb專頁仲愈嚟愈多人 like，依家已經破咗 3,900人嘞。所以話，網民就是力量！
偽文豪自認不平則鳴，不過對於有網友睇完書，話估唔到蘇玉華都咁衰嗰時，佢罕有地幫阿蘇講番兩句好說話。不過，對於佢喺書中狂插嘅吳卓羲，偽文豪就同媽咪姐直言話唔 like！
|
鍾意就快D Share啦！
|
|
|