梁洛施素顏現身，看來她早已習慣隨心過日子。
探熱針
復出做啞女 梁洛施緊張見血
離開香港娛樂圈五年，梁洛施（ Isabella）宣布全面復出，回歸作包括夥拍詹瑞文演出處女舞台劇《快樂勿語》，飾演聾啞女。為打響頭炮，除每日加緊排練勤學手語，又要做運動減肥，收工返到屋企，仲要唧時間同三個囝囝 facetime親子樂。灰姑娘變做單親媽媽，一日二十四小時唔夠用。
每月返加
剛為「第三十三屆香港電影金像獎」做頒獎嘉賓的梁洛施，人在香港唔使湊仔，但工作已經佔去大部分時間。一再強調冇收過前男友李澤楷過億生活費，要自己搵錢照顧三個小朋友讀書及生活的單親媽媽 Isabella，笑言囝囝是她的原動力。
「之前幾年我一直專注湊仔，而家會安排時間兼顧工作，同公司有共識，一個月一定要飛返加拿大一個禮拜同啲小朋友一齊。呢排忙練習，時間有啲顛倒，但只要有時間，我都會同囝囝 facetime。」
師徒鬧交
上週三（四月九日）梁洛施與詹瑞文現身彩虹邨香港聾人協進會，兩人四手，甩甩漏漏學手語。
「唔用說話去溝通，我覺得好難，加上第一次做舞台劇，點會唔緊張？返香港之前雖然喺加拿大學咗幾堂，點知原來每個地方嘅手語都唔同，不過香港嘅手語比較形象化，生動同易記。」梁洛施說。
為了活學活用，上課期間，詹瑞文用手語寸梁洛施，叫她勤力啲趕進度， Isabella即以手語反擊「關你乜事」，相當搞笑。
雖然有師傅拍住上，但 Isabella不諱言手語加舞台劇，消耗體力倍上。
「因為我個角色要用肢體語言嚟加強感染力，所以要配合好多 physical嘅訓練，舞台劇同拍戲好唔同，詹 sir訓練我要認識自己嘅身體。」
爆腳見血
一切從身體開始。早前詹 sir同舞台劇演員玩遊戲，結果， Isabella樂極生悲。
「我俾一個二百八十磅嘅同學踩傷腳趾流血，嗰次真係好痛。」在旁的詹瑞文忍唔住插嘴：「佢好搞笑咁同對方講：你唔好踩我隻腳啦再！講到亂曬龍，不過佢好堅持，痛住都話要繼續，女仔嚟講好忍得。」
除了忍痛， Isabella仲要忍食。
「我目標要減五磅，初初返香港，成日飲奶茶食牛腩麵，結果養咗好多鬼祟肉，而家唔敢出街食，日日帶媽咪煮嘅健康飯盒。」五呎八吋高、一百二十磅的 Isabella說。
|
鍾意就快D Share啦！
|
|
|