張家輝苦練爆肌接拍《激戰》，憑此片打低梁朝偉及黃秋生等人奪今屆金像獎影帝，苦盡甘來。
探熱針
操肌上腦 影帝張家輝師徒反面
張家輝憑《激戰》中的賤輝 KO《一代宗師》的葉問梁朝偉，以大熱姿態成為新鮮出爐影帝，捱苦操肌有回報。據知，瘦底的張家輝 04年曾拜師「香港泰拳宗師」陳德興師傅門下，但性格火爆偏激的他，因為一言不合，反面走人。
冇乜肉
在電影《激戰》飾演綜合格鬥選手的張家輝，在短時間內由鋼條變成筋肉人，加上表現突出，成就他撼贏了梁朝偉、黃秋生及古天樂等對手，二度稱帝。其實張家輝早於○四年開始，已立定決心操 fit自己，當時圈中人流行學泰拳，當中以有「香港泰拳宗師」之稱的陳德興師傅最受歡迎，張家輝亦拜師門下。
「佢（張家輝）話想操 fit自己，擴闊做唔同類型角色，嗰陣都未有咁紅，身材瘦削冇乜肉，師傅見佢咁有決心，咪收咗佢囉！比佢更早入門嘅就有黃貫中同李璨琛。」知情者說。
教訓幾句
往後，張家輝跟陳德興師傅學了幾年泰拳，但最終仍逃不過反面收場，雙方再沒有聯絡。
「佢一有時間就上拳館，最初同師傅感情好好，師傅見佢咁有恒心，好俾心機教佢，但張家輝份人太自我，亦唔係咁識同人相處，師傅覺得佢性格有問題，話過佢幾句叫佢唔好咁火爆，點知張家輝就發曬爛渣，仲用粗口鬧番師傅，跟住走埋冇再返嚟，師傅為咗佢，都唔開心咗一排。」知情者說。
弦外之音
就師徒翻臉一事，本刊到位於土瓜灣的柏龍國際泰拳搏擊中心找陳師傅了解。
「佢跟過我學過，呢啲（再做影帝）係佢自己努力得返嚟！嗰陣好熟，大家都係電影界互相欣賞！（佢同你意見分歧，所以唔再學？）點講呢？佢都跟我學咗好耐嘅，不過佢之後工作多咗，我又要搬拳館佢就搬屋，時間上就夾唔到，所以冇學。（對張家輝有咩評價？）都會見到面，不過冇切磋，而家佢都冇時間啦。好似張家輝咁，佢哋學嘢唔會同人吹水，自己會操爆，撞啱呢類人，佢仲勤力過你，你咪驚咗佢囉！」陳德興說。
雖然沒有直認反面，不過陳師傅一再強調，與張家輝是以前好熟。明曬！
|
鍾意就快D Share啦！
|
|
|
