黃夏蕙財困逼人，要借錢度日，間接令黃夏蕙同相識三十年的祥嫂冰釋前嫌。
探熱針
卅年閨密 黃夏蕙出院 陪祥嫂中環開餐
黃夏蕙上月底疑因操勞過度入院，要將在新光戲院舉行的慈善演唱會押後至七月。上週一（七日）傍晚，八十有二的夏蕙 BB出動，孖住曾因財反目的閨密祥嫂（洪金梅），在中環 Cafe Landmark晚飯，休息十多日生猛番曬的她，一眼關七，見有鏡頭「隊」住，立即嗌埋閨密揮手打招呼，離開時又爭住做祥嫂代言：「祥嫂今日唔舒服，我陪佢睇醫生。」
食得又好氣
紅唇厚妝的夏蕙 BB同黑超鮮黃外套的祥嫂（洪金梅），在一眼睇曬的 Cafe Landmark分外顯眼。指手畫腳的祥嫂講多過食，反而同祥嫂助手坐埋一齊的夏蕙 BB則好好胃口，薯條一條接一條大啖食。舉機影相不過三十秒，夏蕙 BB已經𥄫到，叫埋好姊妹望鏡頭打招呼，還超級熱情大叫：「落嚟一齊飲茶吖！」
三十蚊貼士
這對閨密加埋超過百五歲，但貪靚程度絕不比後生女弱，食飽放低刀叉，二人已急不及待拿出粉盒、唇膏密密補妝。
曾經是胡百全二奶的夏蕙 BB，自稱對方在○四年死後，一直未分到應得的遺產，但同相識三十年的祥嫂醫肚，夏蕙 BB自動波嘔吐兩張「大牛」（五百元紙幣）埋單，還豪氣放低三十元作為貼士。
離開餐廳時祥嫂問：「你哋（記者）邊間㗎？」記者追問二人是否有下場？代言人夏蕙 BB聲如洪鐘搶答：「阿祥嫂有少少唔舒服，陪佢出嚟睇醫生，咁我都好番啦。」
之後二人在商場一直找不到路離開，向記者求救，氣若遊絲的祥嫂說：「為人為到底，幫祥嫂截埋（的士）吖？」最後三人由記者帶到置地文華東方酒店門外乘的士離開。
因財失義
黃夏蕙同祥嫂相識三十年，九六年祥嫂與四名子女為爭產鬧上法庭，好姊妹全程撐，又不時代對方向傳媒發言。○一年，有傳兩人不和，其後夏蕙 BB搞慈善騷，祥嫂都未有蒲頭。
據了解，夏蕙 BB曾介紹租客給祥嫂租用筲箕灣楚留香酒樓鋪位，雙方議好傭金及每個月租金六十八萬，有指事後祥嫂不認數，更說服租客一齊不付傭金，夏蕙 BB一怒之下斷絕來往。
直至○七年，夏蕙 BB財困，名下物業斷供，焗住向祥嫂借錢周轉，二人才再度往來。
|
鍾意就快D Share啦！
|
|
|
