與女友李亞男見得少 王祖藍：我哋就嚟分手
2014-04-07 17:42:00
王祖藍話同李亞男見得好少，佢講笑話再唔見就要分手。(攝影：溫敏芝)
王祖藍同女友李亞男，今日喺尖沙嘴出席郵輪活動，情侶檔一齊搵銀，問佢哋係咪第一次「夫妻檔」做嘢？祖藍即話：「夫妻檔係第一次。」
亞男即時澄清話：「係情侶檔。」祖藍即刻笑住話：「係情侶，你哋都幾陰濕喎。」問佢哋幾時結婚組夫妻檔？祖藍話當然朝住呢個方向去，但暫時未有時間，不過都要情侶檔搵夠錢，先可以組夫妻檔。
亞男就話今日好開心，可以一齊拍拖賺錢，祖藍即話：「係呀，如果再見唔到佢，我哋就嚟分手，成個月都唔係見到，冇乜點返屋企，不過我哋唔係一齊住。」
問到祖藍會唔會開個聯名戶口一齊儲錢？佢話：「其實都唔使，我所有嘢都係佢，佢知我幾錢身家，知我幾多張卡，乜都知。」亞男即笑話：「知啫。」祖藍笑話：「又有說話聽，要檢討下。」問佢哋會唔會搞海上婚禮？祖藍笑話要睇下有冇贊助先。
近日有指王祖藍同涉嫌聘請黑工嘅公司合作，噚晚祖藍即已聲明否認，今日佢話：「因為要處理好耐，件事係啱啱前晚先收到，一起身唯有即刻搵律師，即刻同公司商量，佢針對嘅嘢好多，有好多資料都係錯誤，第一我唔係呢間公司，我請嘅編劇亦唔係呢間公司，我只係租用呢間公司嘅辦公室，所以佢所有資料係錯誤，但憑佢寫嘅野就知係行內人，佢係邊幫人，我心裏都有數。」
咁係邊個？佢話：「我心裡有數就得，發聲明係想講聲真係唔好再搞，有可能係法律行動，佢講嘅所謂黑工全部唔係黑工，所以太有趣，佢應該係喺我側邊伏咗一輪。」
係咪得罪人？祖藍話：「我就冇得罪人，可能佢覺得我得罪咗佢，可能係妒忌，又唔抵得咪搞你囉，世界上有好多小人，有諗唔到既原因搞你0架嘛，不過唔會影響今日心情，繼續開心，忘記他啦。」
一話佢哋係夫妻檔，李亞男即話係情侶檔。
王祖藍話李亞男知佢有幾多身家。
|
鍾意就快D Share啦！
|
|
|