【短片】被王晶斥無聊無恥 偽文豪：無聊無恥係王晶電影作風
2014-04-22 02:40:00
被王晶斥無聊無恥 偽文豪：無聊無恥係王晶電影作風
前無綫PA偽文豪，因為一本《TVB血淚屎》而「走紅」，最近經常接受訪問，噚晚商台節目《國民教育》播出偽文豪接受健吾嘅訪問，偽文豪話自己喺節目乜都講得，當然唔少得講佢本書。
偽文豪表示自從本書出街後，讀者有好多迴響，大家除咗以八卦心態去睇本書外，亦睇到笑中有淚，佢又話「人生好被動﹑決心好主動」，佢話自己做好呢件事係主動去做。
現年30歲嘅偽文豪，曾讀過副學士，之後走去TVB做嘢七個月，近日出咗本「血淚屎」，其間佢亦做過廣告公司編輯，地圖雜誌﹑高爾夫球雜誌編輯，及後去咗《100毛》做編輯。
健吾問佢點解要寫呢本書？話曬呢份工佢做得幾唔舒服，點解唔去忘記？反而要出書呢？為咗乜呢？偽文豪話：「每個作者唔同諗法，有啲人發生唔開心收埋，我就一視同仁......其實冇諗住咁快成書，上年未做《100毛》時有空閒時間，就總結呢幾年搞過乜，喺facebook寫咗幾篇嘢，輾轉後出版社叫我寫埋書，之後集結成書，咁都幾好吖，相當滿意。」
健吾又話偽文豪「走紅」，連電視台都忍唔住用節目作回應，亦有周刊用四版做，其實係咪計算在內？偽文豪坦言：「毫無計算，天跌落嚟，點會有計算？我冇咁醒，可能有啲朋友當我係行銷專家，成件事根本冇人估到係咁，我只係寫番自己經歷，我都算係一個0靚仔﹑呢個身份去講一個行業嘅嘢，呢個行業有堅固勢力，就唔想我去破壞佢哋一啲秩序，咁咪造成依家個效果。」
而曾經喺電視台做兼職嘅導演王晶，睇到《TVB血淚屎》報道後，早前喺微博語帶粗俗留言話：「有個在TVB幹了七個月助導，多次在網上罵前公司的X樣，最近出了本書再罵。」王晶又鬧佢七個月就想登天，斥責佢呢種行為係無聊加無恥。
偽文豪今晚喺節目內再話，自己好尊敬王晶，就算對方鬧完佢，都仍然尊敬佢，事關佢都係飲王晶「奶水」大（指佢睇王晶電影長大），指對方對呢件事好大反應，不過偽文豪仍忍唔住暗寸：「王晶覺得我無聊無恥，其實無恥同無聊，係佢電影一貫作風，佢咁話我無恥無聊，咁係咪讚緊我呢？我承認都幾無聊無恥。」健吾即刻笑到收唔到聲。
偽文豪又讚王晶先生胸襟應該廣闊，一個可以堅持拍咁多年商業電影，點會冇咁嘅胸襟？只不過佢為行內人不值，佢覺得你個0靚仔咁樣攻擊啲同事，佢又可能冇睇過我本書。偽文豪強調書本內容勝過一切：「我享受同讀者來往，讀者睇完有乜感覺，好多睇完都話好正，叫我快啲寫第二本。」
健吾問佢有冇擔心寫完有乜效果及後果？偽文豪直言媽咪都好擔心，不過佢就話：「寫嘢有兩種，一種自娛﹑一種係娛樂其他人，呢本書寫嚟娛樂讀者，我改咗好多嘢，成個flow有結構，點樣令讀書睇得開心舒服，用字呀文筆呀，以讀者睇得開心為主，唔係純文學，係完全商業，但商業都唔係咁易，等同王晶先生咁，你估商業咁易0架？我係好佩服佢，認真0架，啱啱話無恥無聊都係認真0架，但係我有時就係咁，我講真話，人哋覺得我寸緊佢。」
偽文豪「走紅」後接受多個訪問，問到有冇乜嘢問題好難回答？偽文豪話：「我尊重呢個行業，同埋0依家感覺矛盾，因為係傳媒令我被人認識，但同時會好容易被佢哋摧毀。佢哋成日問我有冇覺得自大？呢個問題需要思考，我又唔覺得自大，如果覺得我自大，我都唔會咁自大啦﹗」
偽文豪話自己活在當下，對於有傳媒問佢驚唔驚會被告？佢話：「譬如如果真係告我，會好麻煩嘛，唔係驚，但都要處理，我唔想咁樣。」
健吾又問覺得佢外型係咪幫佢加分，佢話：「冇，不過0依家有人覺得OK，我覺得我唔係靚仔，我係型啫，靚仔同型唔同，我靠內涵提升吸引力。」
另外，健吾笑言羨慕偽文豪有型﹑多女又有腹肌，學打柔術嘅偽文豪自言0依家已經冇腹肌，又謂好多人覺得佢性格似陳強:「陳強比我更多憤怒，我嘅笑容至少都有三成真。」健吾問如何可以做到唔理人點諗，佢就話:「我細個冇0依家咁圓滑，以前更瘋狂，習慣唔係十分理人點睇。」
又以書中影射一向形象甚好的蘇玉華為例，令人對蘇玉華印象打了折扣，偽文豪就話:「我覺得好輕微，hurt到佢都冇計，我好癲，我決定寫一本書，一個專欄，我決定咗有呢個立場，就去。」
偽文豪又以柔術為例，承認曾整傷過人，但這是武術世界，一定hurt到人，呢個世界就係咁:「好多人唔夠純粹，太多雜念，驚得罪人？我冇想過，我唔會作繭自綁，我冇諗過。我想做就做，我只有去同唔去，去就去盡囉。就係咁，冇諗得咁複雜。」佢又話只要宣傳夠了， 就唔會再受訪宣傳。
偽文豪又形容今次係《頑童歷險記》，佢話令佢感受到的是，如果你夠足夠堅強，就可包容比你軟弱的人。見到人家呻辛苦，可能真係辛苦，會勸佢忍一下:「可能係好虛假，但我唔會將對自己要求同對人要求劃上等號。當你用憤怒方式批評人時，都係hurt自己。我呢個態度係令雙方舒服，我都舒服好多。」
至於這七個月「奇幻之旅」，偽文豪表示最深刻係一次喺古裝劇拍攝:「淩晨4點起身，好攰，拍到下午，我企喺度，拎住支燈，瞓咗。之後我醒咗，啲人冇曬，成team人冇曬，搵下搵下，原來過咗隔籬街。導演冇可能見唔到我，但我返埋去繼續做嘢，大家當冇事發生。可能我miss咗好多嘢，但佢哋都體現咗佢哋嘅堅強同包容。」
而偽文豪噚晚喺facebook就話：「剛剛聽返我喺903國民教育嘅訪問.....原來我又喺度亂Up（噏）嘢~~哈哈~ 我份人就係咁，好似一出世就食錯咗一隻叫做『口沒遮欄』嘅藥咁。」
偽文豪（左）話雖然被王晶鬧爆，仍然好尊敬佢。（資料圖片）
偽文豪因為出咗本書而走紅，近日不停接受訪問。（資料圖片）
王晶早前喺微博鬧爆偽文豪。（資料圖片）
偽文豪facebook
|
鍾意就快D Share啦！
|
|
|