李美鳳電眼狙擊羅霖
誰說聞魔色變？潮流指標保養得宜的女星都稱為美魔女，50歲李美鳳、48歲羅霖、54歲余安安及47歲溫碧霞當之無愧，四美魔女昨同場出席護膚品活動，掀起搶鏡大混戰。李美鳳與羅霖當年分別選港姐及亞姐出身成魔，失婚羅霖近日解放行性感吸睛，有老公錫到燶的少奶奶李美鳳，昨風騷使出魅力電眼狙擊露肩羅霖！
李美鳳、羅霖、余安安及溫碧霞均出道超過二十年，但仍保養得宜，如同吃了防腐劑，堪稱娛圈美魔女。四美魔女昨獲護膚品牌Estée Lauder邀請在中環四季酒店出席活動。美魔女混戰，以李美鳳使出一對不跌watt電眼火併白滑香肩羅霖最聚焦。四美魔女中，年齡最大、54歲的余安安淡妝黑白配，造型簡約帶型格。87年港姐亞軍、50歲的李美鳳濃妝襯黃裙，狙擊48歲的失婚亞姐冠軍羅霖。而47歲的溫碧霞則繼續玩跌膊，廿年如一日。四女加埋接近200歲，艷光仍力壓同場後輩，足見薑是老的辣！
■（左起）莫文蔚、李玟及李美鳳分別以綠、紅及黃色衫亮相，看來事前有夾過。
羅霖計劃從商
近期人氣鼎盛的羅霖，與劉坤銘的不愉快婚姻仍未畫上句號，她昨說：「呢兩年幾佢都唔肯簽（指離婚），估唔到點解，律師都好𢱑頭話，佢要繼續玩我可以。我哋分開兩年，法庭批咗暫准離婚書，三個小朋友共同撫養，但判咗跟我，佢唔租屋畀我，我就唔可以同三個仔一齊住。」有報道指劉坤銘沒給贍養費，羅霖說：「對某人嚟講啲錢係贍養費，我覺得係未夠爭我嘅一半，喺和解上冇提呢筆錢，我角度係一毫子都冇，佢有佢講，我有我講。」她又說：「唔會問佢拎，唔想再糾纏落去。打官司有精神壓力，好想卸下包袱，專心做嘢同湊仔。」她更計劃稍後從商。
【美魔女1號50歲李美鳳】保鮮度：4
【24歲電眼初現】■50歲的李美鳳昨於中環亮相護膚品牌活動，對比87年選港姐時，一雙招牌電眼依然煞食。
相反在台灣過慣少奶奶生活的李美鳳，昨也悉心打扮返港撐場，剛跟丈夫及一對15歲子女在峇里充完電，令她一對電眼的電力更充沛。對於被冠美魔女，李美鳳說：「可唔可以有個好啲嘅名？有個魔字好evil，我接受年紀老，我有魚尾紋同抬頭紋，自己年紀做好自己。」她又大讚娛圈多靚女：「林青霞好雍容華貴，鍾楚紅就有魅力，朱玲玲都高貴。」講到一對寶貝子女，她說：「仔女返學好忙，我珍惜同佢哋一齊，呢次旅程仔女仲同我分享小秘密。」她表示有時會跟子女欣賞愛情片，並從中暗示兼作性教育指導，又勸他們要愛惜前途。
【美魔女2號48歲羅霖】保鮮度：5
【26歲典雅亞姐】■羅霖近來行性感路線，有別91年選亞姐的高貴美。
至於溫碧霞貫徹至愛的露肩打扮亮相，她表示復活節會到峇里度假，下月再去希臘拍攝寫真集，收益捐給慈善機構。
【美魔女3號54歲余安安】保鮮度：3
【44歲水著驚艷】■余安安多年來樣貌沒變，03年更以索爆水著拍戲。
莫文蔚撐Fiona
而莫文蔚（Karen）及李玟（CoCo）分別以螢光綠及全紅look亮相，再加身穿黃色衫的李美鳳，三人合照如紅綠燈。Karen獲頒發「自主人生大獎」，並獲10萬獎金，她表示會捐給薛凱琪（Fiona）呼籲大家捐助的樂心動物庇護所，不過近日爆出這間收容流浪貓狗的庇護所面臨逼遷，善款又去向不明，Karen希望盡一分力伸出援手：「我知佢哋需要200萬，希望幫到手。我信Fiona，有時籌得嚟嘅善款未必即用，不過佢哋7月要關，時間好急。」至於Fiona昨於微博留言：「如果可以救到200多隻動物的生命，傷害了『我一個人而已』，我可以承受。」
採訪：林嘉慈
攝影：黃偉雄
【美魔女4號47歲溫碧霞】保鮮度：3
【25歲跌膊海潮】■溫碧霞92年憑海潮一角爆出，22年後的今日依舊愛玩跌膊。
|
鍾意就快D Share啦！
|
|
|