無綫前PA出書 陳志雲寫序 怒爆TVB黑幕
2014-04-08 10:57:00
唔知大家仲記唔記得好耐之前，有位自稱係無綫藝員部前經理盧智仁的人近日在微博爆料，指無綫多年來於每個內部地方長期安裝攝錄機監控員工舉動，盧智仁更言之鑿鑿指當
中收錄嘅影片都係TVB不為人知嘅驚世事件，盧又在微博上載了六叔、六嬸、樂易玲、曾醒明和藝員部前揸弗人趙崇文嘅偷拍照，疑似要加強事件嘅可信性。
之後呢個「盧智仁」都有於網上不同渠道宣佈有更多猛料要爆，但一直只聞樓梯響。不過依家就有一個自稱係無綫前助導(PA)嘅「偽文豪」出書爆料，大爆喺TVB嘅辛酸史。書名，就係叫《TVB血淚屎》。前無綫高層同舊部，包括陳志雲、艾威、廖啟智等，都幫手寫序。唔似係流喎!
眾所周知，做PA，辛苦同收入唔成正比之餘，仲往往成為監製同藝人出氣袋，做阿四又要受氣，由最低捱起，捱得過就成大器。而呢本書，就係由呢位改筆名叫「偽文豪」嘅無綫前PA操刀，大爆佢07年入無綫做PA嘅辛酸史同藝人「真面目」。因為佢喺無綫只係做咗七個月，故參與過嘅劇，得《少年四大名捕》同《大冬瓜》。
「偽文豪」爆嘅辛酸史，包括:
1.唔使講，有開工時間冇收工時間；
2.有PA家中有白事，但只准請兩天假，之後開工，仲要日日俾導演「問候」。
3.「Chok峯」(你估邊個啦…)鍾意爆粗，但為人冇咩架子，正常人一個，不過有時都會請埋人家「伯母」一齊開工。
4.插得最勁，係「臭蝦哥」，揞名爆，有份拍《少年四大名捕》，名曲係《別怪蝦》其實已呼之欲出。「偽文豪」怒爆臭蝦哥擦監製鞋就好聲好氣，但服裝姐姐幫佢著古裝衫時唔小心拮親佢，「臭蝦哥」即忍唔住爆咗句「好x痛」……查實，都好人之常情，可能真係極痛之下率真反應；「偽文豪」之後再爆「臭蝦哥」嫌替身拍完戲之後成身臭汗，當時大家同坐一車，去到某個location有工作人員要落車，此時「臭蝦哥」即大嗌:「喂!啲臭人唔該落車先啦，好很臭呀!」
5.古裝劇驚現金毛尋回犬。「偽文豪」話佢明明喺道具紙寫住係要「唐狗」，但最後有人搵咗隻金毛尋回犬。
事後「偽文豪」接受周刊訪問，堅稱句句屬實並無虛言，更再次插爆「臭蝦哥」謂:「臭蝦哥堅衰0架，佢之後仲成日寸鬼我，又蝦其他人，相反馬國明真係好好人，好錫啲細0架!」其實都已經係07年嘅事，無論「臭蝦哥」定「Chok峯」都大個仔咗成熟咗，依家攞番嚟講……又好似有啲唔公平囉。
|
鍾意就快D Share啦！
|
|
|