蘇施黃一早plan咗放假？ 繼續被抽水
2014-04-20 17:22:00
做人，最緊要喺適當時期抽嚇水，咁就可以增加曝光率。好似白健恩咁。
蘇施黃嘅【請廣傳】「茶包」事件，已經out曬，但亦有啲人好似條件反射咁，一提起茶包，自然就聯想到阿蘇。亦有啲人繼續抽水。例如唔係成日見到報嘅白健恩，噚日喺微博貼咗張相，寫話：「啲間酒店真細心，知我鍾意飲茶，但驚唔夠濃！所以比兩個茶包我！幾多錢？都係$46喳！」ok，咁就有曝光率同埋有留言，既方便，又快捷！
講番蘇施黃，周一(14日)開始阿蘇向商台請咗一個禮拜假，令人覺得佢係想避風頭。今日商台首席智囊陳志雲同胡琳、糖妹等歌手，喺數碼港出席活動，佢就幫手解畫話阿蘇係一早計劃咗放假，佢話：「佢一早計劃，只係巧合。」咁阿蘇幾時返工呢？陳志雲話唔肯定係咪星期一。問到覺唔覺得阿蘇咁講會影響侍應工作？佢話：「唔會，係佢私人意見，而且佢都有反思。」
志雲大師又話阿蘇只係發表自己意見，但都有反思。
今日喺數碼港嘅活動，仲有糖妹~
胡琳都有到場。
志雲大師話阿蘇向商台請假，係一早計劃好喎，唔係避風頭。(攝影：黃曉妍)
|
鍾意就快D Share啦！
|
|
|
