今年 5月 6吋手臂
經過今年 2月的尿道手術後，司馬燕一度瘦至 64磅。 5月她已輕微增磅至 72磅（圖），但體重仍比去年輕 10磅。
娛樂喧
開刀換尿管 再食化療藥 72磅司馬燕：要走，我都無悔
抗癌勇士司馬燕（ Michelle），自 12年 10月發現胃癌並即時切除整個胃，經過一年多共 8次化療後，正處於康復期。
2月中，她因腰痛及難以小便，要由荷蘭急飛返港入院醫治。初時以為癌症復發，但經醫生檢查後，原來是息肉增生壓住膀胱尿道， 4日內動了兩次手術，在膀胱裝上暫用的人工尿管。今個月，她要再次動手術換新尿管，還要開始服食新療程的化療藥。
一連串手術令本已消瘦的司馬燕，體重一度跌至 64磅，近日升至 72磅的她表示，未來一年都會乖乖留港休息。康復道路實在漫長。
司馬燕坦言：「阿仔眼中我係好媽咪，老公眼中我係好老婆，如果要走，我都無悔！」
剛滿 51歲的司馬燕，過了一年多「冇胃」生活。她自去年 7月與老公吳忠義到荷蘭古堡補辦婚禮，周遊列國後，二人原定今年情人節再到荷蘭旅遊嘆世界兩星期。可惜到埗才幾日，她突然腰痛冇法站立，最後決定買機票提前回港並即時入院。
留 12吋疤痕
「我都算幾忍得痛，初時以為坐車坐得耐所以腰痛，加上幾日都去唔到小便，之後就痛到成個人都企唔直，最後同老公商量，即時訂機票返港。嗰次真係好深刻，因為情人節喺飛機過，而且機上我同老公要分開坐。佢知我好痛好辛苦，所以成日走嚟陪我，落機時我要坐住輪椅即時入院。」司馬燕說，入院後經泌尿科和腫瘤科等醫生詳細檢查後，四日內動了兩次手術，切除了扭曲的尿管，再將膠管放進尿管內作鞏固。
及後驗出腎臟有息肉而非癌症復發，總算只是虛驚一場！「好彩係 3粒息肉咋！做手術前醫生要我簽紙，如果開刀後發現係腫瘤就要即刻切除。呢次手術，係由腰後開到膀胱位置，一條超過 12吋長的疤痕，就好似多咗條人造人魚線咁。」由於人工尿管每次只能維持 3個月，在 2月手術後，司馬燕下星期需再入手術室，把膠管抽出，植入另一條新的膠管。見老婆再次檻過鬼門關，冇牛不歡的丈夫吳忠義，決定為愛妻再戒食牛一年。
經此一役，令本已安排了一連串外遊行程的司馬燕變回乖寶寶。「冇喇！唔再周圍飛喇！原定 4月去溫哥華， 6月到英國陪大仔揀大學，但身體要緊。依家我乖咗好多，呢個月仲要開始食口服化療藥，所以會比平時攰，每日都會爭取時間休息。之前手術後跌到得 29kg（約 64磅），好彩皮膚都好好冇乜點鬆弛，只係個樣變咗 V煞面，但上鏡幾好睇啦。」記者採訪當日，司馬燕體重已回升至約 72磅，但手臂依然激瘦，膊頭位置的骨頭更十分凸顯。
無悔生命
過去一直樂觀奮戰癌魔的司馬燕，面對身體上的缺陷，仍表示會欣然接受。她說：「我一路以嚟都冇喊過，如果要走我都無悔。喺囝囝眼中我係好媽咪，老公眼中係好老婆，就已經好足夠。依家只係想活在當下，不過我唔會選擇放棄，我係一個 fighter，只希望到（走）時唔痛唔辛苦。」最後，司馬燕還表示老公是位知識分子，兩名寶貝兒亦已經長大，若然一日自己有任何不測，亦深信老公有能力照顧好一對囝囝。
手術延誤可大可小
今次司馬燕當機立斷即時回港入院做手術，絕對是明智之舉，因為若再稍遲入院，命仔都有機會不保。關嘉美醫生表示：「如果輸尿管塞咗，除排唔到尿調節唔到身體水分外，體內嘅電解質亦平衡唔到，咁好易影響新陳代謝，嚴重有機會導致死亡。另外，阻塞得耐更產生炎症，如腎盂炎或腎炎，會引致高燒，細菌感染入血，最後會演變成敗血病及腎衰竭。」
|
鍾意就快D Share啦！
|
|
|