滾熱辣
翠蕭局演消毒騷 小三翠如𤓓爆嗌分手
唉！同人唔同命！「翠蕭戀」被斷正，「何蕭戀」亦被斷正，今次「翠蕭戀」大台就出盡力，搵《東張西望》為翠蕭兩人消毒。因為翠如 BB係高層余詠珊愛將，為拯救翠如純情形象，蕭公子局住肉麻示愛，更親證翠如 BB唔係小三、小四，落足洗潔精加漂白水，一於去汙又消毒。
周三，本來《東張西望》加料，搵翠如上節目吐苦水，最後翠如縮沙。據知由 BB變姣 B的翠如，自感𤓓爆，又不甘在男友車廂屈蛇逃走受辱，兩人吵大鑊嗌分手。
又一次證明「邊有唔食魚嘅貓」，蕭正楠遇上外表純情，內裏 open的翠如姣 B，又點會唔中 BB降。去年 11月，翠如早就瞄準上位中的蕭正楠，儘管當時蕭正楠已名草有主，但恃住有大台高層余詠珊撐腰，她密謀暗中搶仔。
翠如姣 B姣溝蕭正楠，為免「小三」打爛純情形象，年初被揭撻著時，她更擘大眼講大話，說當蕭是大佬︰「同佢冇可能。」
鬧爆被迫趴車廂
可惜紙包唔住火，最近有周刊斷正兩人返歸過夜。報道出街後，黃翠如震怒，又埋怨蕭正楠要佢匿車廂趴地。「當時蕭公子發現記者跟車，翠如喺車上面，蕭公子二話不說就叫翠如趴低，扮車廂冇人。報道出咗後，翠如覺得好肉酸，更為呢件事同蕭公子吵大鑊，又猛嗌分手。」知情者說。
報道出街翌晚（ 12日），蕭正楠被高層急召返大台上《東張》，強調自己是單身，目的是力保黃翠如純情形象，並非小三。蕭正楠在訪問中，戮力護花，「佢好純，大家好夾好有默契……好難得撞到咁好嘅女仔……我單身咗好耐，冇小三、小四、小五……」言辭肉麻到極，訪問還一晚播兩次。據知訪問出街後，被網友狂插，消毒騷變放毒騷。
消毒騷一出，沉默多時的何傲芝終於爆發，在微博反擊，引用當年舊愛的經典金句：「邪不能勝正！」何傲芝在 WhatsApp中表示︰「唔想愈描愈黑。」但她強調沒有馬主新歡︰「不是事實不回應。」她表示︰「多謝關心。」
對於「翠蕭」連日的風波，力撐黃翠如的余詠珊指︰「當日蕭正楠被追訪走投無路好慘，佢亦都打算公開，唔想翠如一個人面對群眾，咪利用公司嘅節目，由男仔去承認。男未婚女未嫁，拍拖好正常……」余詠珊企圖減低事件對兩人形象的損害程度。余本來還安排黃翠如在周三晚再演消毒騷。不過，翠如自感太𤓓，最終決定龜縮。
搶角色做正印
其實，黃翠如純情背後，搶嘢甚有計。去年她為了在《師奶 MADAM》中與蕭正楠演夫妻，就勁冧監製李艷芳，成功從黃智雯手中搶走角色。開劇不久，翠如姣 B已採取主動，劇中兩人演夫妻，名正言順攞正牌互冧。黃翠如不時在蕭正楠面前扮傻扮懵，並藉機挨身挨勢。
有工作人員透露︰「佢對住蕭公子成日嗲聲嗲氣，翠如一個電話，蕭公子漏夜都幫佢買消夜買糖水。」
今年 1月，「翠蕭」撻著已傳遍大台，當然亦傳到何傲芝耳中。當時蕭正楠向女友保證，與黃翠如只是演戲。雖然男友唔認搭上翠如姣 B，但大台耳目眾多，唔少睇唔過眼的人勸何傲芝「睇實男友！」有次黃翠如在化妝間遇見何傲芝，立即扮打電話，目光不敢正視何傲芝。
黃翠如姣功淩厲，步步進逼，不時 WhatsApp蕭正楠，三句唔埋發放「 I miss U！」訊息，附加 kiss公仔。蕭正楠開始對翠如大獻殷勤，收工也不回家，寧願喺廠捱眼瞓等埋翠如收工，然後車對方回馬鞍山寓所，自己才返回荔景。
美麗分手謊言
當時何傲芝獨守蕭家，晚晚在家喊，試過喊到妝都上唔到，農曆年更向公司請了三天假。而蕭正楠為𠱁何傲芝，試過送上頸鏈安撫，更誓神劈願話唔會同黃翠如一齊。不過最終蕭正楠都難逃翠如姣 B的引誘，搵藉口向何傲芝提出分手。
輸家何傲芝本來還有一絲希望與蕭正楠復合，因為當初兩人分手時，蕭正楠更俾個假希望她：「我想專注事業，遲啲大家再喺番埋一齊……」但兩人斷正過夜後，何傲芝完全死心。三月約滿的她，本來還在考慮會否與大台續約，但現在為免日後眼寃，已決定唔續約。
周二，她從將軍澳住所到尖沙嘴 K-11時明顯眼腫腫，更一味表示唔想再提起蕭正楠與黃翠如，只想盡快收拾心情工作。
愛情向來都是一盤數，昔日蕭公子與何傲芝多次被影到拍拖，都死口唔認。不過，今次撻著的是有「珊」罩的黃翠如，蕭公子想唔認頭都幾難！他計過度過，都知邊個女人唔好惹！
《東張》消毒變放毒
05年啟播的《東張西望》，本來是時事節目，不過近年已淪為大台的消毒騷，為大台或旗下藝人補鑊，偏頗報道多次受市民抨擊。
抹黑港視
去年王維基申請免費電視牌照失敗， 11月時節目曾以半小時報道事件，質疑港視只有美觀外殼，實則未能運作等批評，公器私用。事後收到 2萬 5千個電郵投訴。
翠如繼續扮純情
東窗事發，蕭正楠要出來做醜人做消毒騷，但黃翠如則戮力在 facebook繼續扮純情。
藝人撐傲芝
正印網上反擊
何傲芝對傳媒口密，但係佢喺網上就不時發功，暗寸情敵黃翠如。
|
鍾意就快D Share啦！
|
|
|