張崇德夫婦睇婦產科被拒 嬰兒性命只值15萬
2014-05-31 20:03:00
張崇德夫婦長子夭折案經歷9年，最後都得到結果。(資料圖片)
張崇德同太太劉美娟，為尋找長子天藍出生26個小時後夭折的事實真相，還囝囝一個公道，用咗9年時間去追求真相。最後醫務委員會裁決為天藍接生嘅婦產科專科醫生蔡明欣四項專業失德罪名成立，判停牌24個月。至於為天藍搶救嘅尹錦明，雖在臨床判斷上有失誤，但未至於構成專業失德，所以裁定佢一項專業失德指控不成立，張崇德同劉美娟都覺得判刑太輕，而喺近日一篇報道當中，佢哋兩個仲講到呢9年所經歷過嘅事。
喺呢九年期間，張崇德同劉美娟有咗第二個BB，兩人憶述當年去睇婦產科醫生，曾經聽過一啲好難聽嘅說話。張崇德憶及：「嗰個醫生講啲說話好衰，好殘忍，佢詰：『有咗隨時會小產喎。』醫生唔想睇我哋，但又唔可以推，美娟當場流眼淚，我哋只好走。」
張崇德又講到，打官司期間，一直有好多人鬧佢哋：「民事訴訟賠償咗，你哋要嘅錢已經拎咗，仲搞乜嘢？想整死人咩？」但係張崇德就話：「我哋唔好同佢嘈，因為終有一日你哋會明白我哋做緊乜。」
佢哋仲搵咗好多律師幫忙，甚至有律師願意打個折頭畀佢哋，而兩人喺過程當中，仲發現一個無情嘅真相，就係原來喺法律界一般常識之中，一個嬰兒嘅生命，只係值15萬。
聆訊其間，兩人亦聽到好多，難以接受嘅說話，劉美娟憶述：「有一個位，我忍唔住喺庭上哭了，辯方律師迫我承認自己嬲同傷心，以證明我嬲所以想整死個醫生，我終於忍唔住講：『你試下生個仔出嚟，唔可以抱佢，唔可以見佢，你會點？』我講完，他沒聲出。」
張崇德同劉美娟喺生第二胎嘅時候，婦產科醫生講過啲好難聽嘅說話。(資料圖片)
劉美娟仲透露喺聆訊其間，聽到好多好難聽嘅說話。(資料圖片)
佢哋嘅長子天藍出生26個小時後夭折。(資料圖片)
婦科專科醫生蔡明欣被控七項專業失德，有四項裁定成立，判停牌24個月。(資料圖片)
|
鍾意就快D Share啦！
|
|
|