自製奶茶
細細粒一去到水吧，唔使兩分鐘，就整好一杯珍珠奶茶俾自己嘆，手勢純熟。
娛樂喧
學 Baby開 Café 細細粒做侍應偷師
二百三十多磅的細細粒（小寶）出名為食，鏡頭前後食物不離手，喪食形象令她成為新一代「開心果」。食住「為食妹」條水拍劇拍電影外，更密謀開食肆，為日後鋪路。
近日，她頻頻落代言的日本餐廳幫手，向老闆娘偷師。記者放蛇發現她瓣瓣掂，由水吧、傳菜及招呼客人都一腳踢。事後細細粒自爆：「目標係學 Angelababy，開番間『小寶 Café』！」
細細粒入行只數年，但已密謀搞生意，生性愛吃的她一心開食肆。為了圓夢，她近日每星期都會抽兩日落代言的食肆幫手，藉此取經，為日後鋪路。「細細粒把口好得，佢幫食肆做代言人時，冧得掂老闆娘。就算依家開緊劇，但一有時間佢就落舖幫手，老闆娘見佢咁落力為食肆宣傳，不但教佢好多 sell客技巧，仲應承分幾個%嘅 commision（傭金）俾佢。」知情者說。
戲如人生
關心妍新歌《愈來愈正常》 youtube點擊率逾 20萬。 MV中細細粒搏命食又搏命做運動減肥。睇嚟現實中佢都要咁做！
3年前， Angelbaby投資 200萬在朗豪坊搞 Baby Café，現時已在尖沙嘴及屯門開多兩間分店，難怪細細粒以她為目標。
親民招客
22日晚上，細細粒在九龍城代言的食肆不但親自傳菜，又落手落腳招呼客人。食客最初發現她招呼客人都有點驚訝，但細細粒極度親民，不時笑笑口打招呼，又為生日的顧客唱生日歌搞氣氛，不少食客與她合照吹水。
醒目的細細粒不時滿場飛，見水吧缺人即自動補位，幫手沖珍珠奶茶，她的手法純熟，看來訓練有素。水吧位置靠近門口，有些路經的市民舉手機影她時，她會打蛇隨棍上：「我係呢度嘅代言人，你哋多啲入嚟幫襯吖！」
愈做愈肥
雖然細細粒做到冇時停，不過，為食的她亦不時發揮小宇宙，邊做邊食，難怪當日見她肥腩比以前更誇張，進出水吧時更要縮肚出入。細細粒在晚飯高峰期 7至 11時幫手，做足四粒鐘才離開。離開時更向本刊直認學做老闆。
記：記者細：細細粒
記：見你落手落腳招呼客人，辛唔辛苦？
細：老闆娘黎太好錫我，佢話我後生要學嚇做生意，自己都諗過好似 Angelababy咁樣開番間「小寶 café」。
記：間舖你有股份？
細：我有份抽 commision，嚟呢度係學嘢。
記：見你邊招呼客人邊食喎！
細：係呀！食嘢最緊要係氣氛，我喺呢度嘻嘻哈哈，都係希望大家食得開心。
記：同客人合照又唱生日歌，唔尷尬咩？
細：唔會尷尬，熟客都知我成日嚟。佢哋想見我嚟食嘢，我就開心喇！
細細粒笑指自己近廚得食，體重已上升十幾磅，原本減掉的廿磅差不多還原。不過她笑說食得開心都冇所謂，看來「開心果」就是咁練成的！
親力親為
藝人做生意例子多，但凡事親力親為，又唔介意拋頭露面，則非常少見。
|
鍾意就快D Share啦！
|
|
|