打頭陣
百萬打發小三 Liddy 彭順秘密攜妻返港攤牌
介入彭順及李心潔婚姻的𡃁模 Liddy（李悅彤），日前被揭是哄動九龍灣啟晴邨槍殺案疑兇李德仁的女兒後，坎坷身世曝光，再成為傳媒焦點。一直潛水的 Liddy周二（ 3日）早上與母親在沙田富山殮房認父屍首度現身。
據知 Liddy被揭做小三後再加喪父之痛，情緒陷崩潰狀態。六神無主的她頻頻致電彭順死𦧲。至於偷食斷正的彭順，為了向老婆李心潔派定心丸，上周四（ 29/5）攜妻秘密返港，原打算與小三 Liddy攤牌搞清關係，但被 Liddy父一槍打垮大計，為免再刺激 Liddy，彭順局俾百萬掟煲費。
不過，半年前 Liddy為了彭順與有米未婚夫 Simon分手，現在彭順想用完即棄，似乎冇咁易！
彭順偷食𡃁模 Liddy爆出後，旋即急返大馬向老婆李心潔負荊請罪。傷心欲絕的李心潔被激到入院吊鹽水（更有傳是自殺），李父揚言會為女出頭教訓女婿，連彭順的女兒欣欣亦撐後母。成為眾矢之的的彭順，局住公開道歉，揚言與小三斬纜。為了令愛妻息怒，秘密偕妻返港，打算當面與小三攤牌。
住酒店避記者
彭順偕妻秘密返港的消息，其實來自譚詠麟。上周四，阿倫與李克勤到大馬開個唱記招時突然爆響口︰「你哋唔使喺大馬等，彭順兩夫婦今日已返咗香港啦，我喺香港機場見到佢哋入境。」據知彭順夫婦為避傳媒，沒有返回大坑寓所，在港島區租酒店暫住。
至於 Liddy，被爆做小三後亦透過 WhatApps向友人呻爆︰「我和他是真感情……不是想破壞人家，也不是博上位」，「好迷惘……我未試過咁樣俾全城圍剿……除咗喊我唔知可以做到咩……」明搶人夫，但 Liddy卻扭曲愛情大曬。
據知彭順返大馬後，小三 Liddy不斷致電他哭訴，風頭火勢下，彭順惟有向老婆誓神劈願返香港同 Liddy攤牌，為了表示決心，他帶埋情緒欠穩定的老婆李心潔同行，方便照顧。
折返大馬
彭氏夫婦到埗不足兩天，便發生 Liddy父親槍殺案兼吞槍自殺，令彭順的攤牌計劃被迫打住。「彭順見咁嘅環境，佢都唔敢講分手刺激 Liddy，怕佢要生要死，搞出事仲大鑊。最後彭順惟有攞七位數字俾佢解困，又幫 Liddy安排咗架中港車，等佢避開傳媒追訪。」
攤牌不成，彭順見事件愈鬧愈大，惟有秘密再折返大馬，繼續龜縮。彭順要付百萬掟煲費，連之前為 Liddy的百萬解約費，數目不少，但為免成為世紀殘男，亦甘心科水。
與 Liddy熟稔的𡃁模 Naomi表示︰「 Liddy份人雖然好勝，但絕唔係見錢開眼嘅人。上年年尾同佢去個生日會，有個又靚仔又有錢嘅富二代想追佢，但佢都唔受溝。」
當時 Liddy已經同人夫彭順一齊，而彭順更向她承諾會離婚，天真的 Liddy信以為真。 Liddy密友爆料：「班姊妹都提醒佢，但佢聽唔入耳，仲話彭順一早同老婆李心潔已經分房瞓，冇性生活好耐，所以自己唔係第三者喎！當佢知道彭順返大馬箍老婆時，癲咗咁喊，猛打俾個男人，鬧佢講大話。」
陪酒養家
在湖南出生的 Liddy來自破碎家庭， 92年隨母來港定居，因為父親包二奶，醉酒返家便打母親出氣，令她飽受壓力。尤其 4年前父母離婚後，為了照顧沒工作的母親及患抑鬱病的妹妹，經濟重擔便落到她身上。
自小發明星夢的她，曾向友人透露希望有天飛黃騰達，改善家人生活，所以中學時期她已經兼職模特兒。而本來在美容院做登記護士的她，因月入僅得數千，入不敷支下，曾試過在中環夜總會陪酒，月賺三、四萬。
情傾熟男
「佢最艱難嗰陣真係做過陪酒妹，差唔多半年。不過，後來識咗有米男友 Simon後，佢就冇做啦。 Simon家底厚，都好錫 Liddy，仲養埋女朋友阿媽同個妹。 Liddy初時都疊埋心水諗住嫁，不過去年初識咗彭順，佢哋一拍即合。 Liddy一向都鍾意啲成熟嘅男人，加上彭順𠱁𡃁妹真係有一手。最後 Liddy為咗佢同 Simon分手㖭！」知情者說。
又難怪 Liddy落疊，兩人黐埋冇耐，彭順已在日出康城租了個單位照顧 Liddy一家，大手筆為她付百萬解約費，幫她贖身，更鋪橋搭路為 Liddy圓明星夢。去年底， Liddy終於在彭順徒弟黃柏基執導的電影《四非》中擔正女主角，令多年來在娛樂圈浮浮沉沉的她，重現曙光。
不過，正當 Liddy以為愛情事業「苦盡甘來」之際，突然間愛人及親人接連消失，連番沉重打擊下， Liddy情緒面臨崩潰邊緣。對於用錢打發她的彭順，她惟有死纏爛打。彭順呢筆蘇州屎，相信冇咁易清理！
黐仔脫貧
09年入行的 Liddy，以飾演「 Sing之天使」入行。同年拍《四葉草》時與羅鈞滿撻著，不過只拍拖數個月便分手。翌年，便與有錢男友 Simon拍拖，兩人同居之餘，更有指 Simon包養 Liddy一家。去年 Liddy搭上彭順，彭順更在將軍澳為她租下寓所。
高調示愛
Liddy出事後刪走自己微博，原來她在微博上不時寫下自己心聲，高調曬愛。
|
鍾意就快D Share啦！
|
|
|