生果都唔買多，楊思琦只買了兩個火龍果。
探熱針
慳錢讀名校 楊思琦 100蚊買餸
飛甩空心吳帥後，楊思琦獨力湊女供樓養家，更遭無綫打壓大幅減人工，唔想揸頸就命，最終離巢外闖。有指近日與苗僑偉成立經理人公司的曾志偉，正遊說楊思琦簽長約，又幫她搭路拍內地電影《午夜蝙蝠》，雪中送炭。
單親媽媽膊頭重，楊思琦凡事以女兒 Krystal為先，乜都慳！唯獨女兒讀書唔慳得！上週四（六月五日），送完寶貝女返九龍塘 playgroup，楊思琦為省錢，寧願揸半小時車返回將軍澳平街市買餸，都唔願去較就腳的九龍城街市，仲要限住買餸錢在一百蚊左右，慌死使大！
多謝曾志偉
為求生路，楊思琦焗住離開娘家無綫，短短個多月，接下一部內地電影、美甲廣告、商場騷和內地商演，收入遠勝留在無綫後期。
對楊思琦施以援手的，還有與苗僑偉成立經理人公司的曾志偉。「（志偉想你簽佢間經理人公司？）點解有咁嘅傳聞？其實我依家未咁快諗簽公司，工作方面都係啲朋友幫我傾住先，套電影係內地投資方搵我，不過志偉哥係嗰部戲嘅總策劃，佢份人好 nice，好肯幫人，以前都成日請我上《獎門人》節目，好多謝佢！」楊思琦說。
因為遭受打壓，才決定約滿離巢的楊思琦承認外闖，是想搵更多機會。
「話好唔好（離開無綫）係見仁見智，我唔想多講！走嘅原因，重要係睇番自己嘅需要。我想趁仲後生，出去睇嚇有冇多啲機會，想俾心機做嘢，始終依家要照顧囡囡同屋企人。漫漫長路，我都係盡力咋！」
另起爐灶
殼王陳國強入主無綫後，與他分屬好友的曾志偉一直在背後充當軍師，直至去年，曾志偉另起爐灶，秘密與苗僑偉、戚美珍自組經理人公司「愛•好娛樂」，更專向無綫旗下藝人埋手，挖角名單包括佘詩曼、謝天華等一線小生花旦。今年三月，志偉打響頭炮簽下台灣男子組合「棒棒堂」，成為公司首批藝人。
唔抗拒第二春
將十年青春先後交託兩個男人，為戀上吳帥放棄李泳豪被千夫所指，最後未婚產女，吳帥人間蒸發，錯愛換來惡果，楊思琦默默承受，卻絕口不提吳帥。
「都過咗去唔會再講！」但對於外界認為她因為錢，誤將空心吳帥當成金礦，楊思琦反應極大：「從來唔會睇錢去識朋友，以前係將來都會係！」
對愛情是否還有憧憬，三十五歲的楊思琦說平常心！
「依家要湊女、亦忙於工作，順其自然唔會話好想佢快啲嚟！我對愛情睇法好簡單，只要大家傾得埋就得，但都唔會刻意搵，隨遇而安！」楊思琦說。
兩頭騰慳餸錢
由○一年得港姐冠軍入行至今十三年，楊思琦出名慳妹，做咗單親媽媽，更加精打細算。
上週四，送完女兒返九龍塘 playgroup後，楊思琦唔揀就腳的九龍城，寧願揸半小時車返將軍澳厚德邨街市買餸。
現場所見，楊思琦與媽咪在街市快買一圈，包括：兩個火龍果、十多元的湯料包、四隻鮑魚仔和一斤菜芯，一百蚊搞掂一餐。買完餸，又揸車折返九龍塘湊女放學，騰來騰去。
「佢好緊張個女，話幾辛苦都要俾最好環境佢成長，好似返 playgroup嘅使費每月都過萬，思琦仲搜集咗好多名校資料，又幫個女儲定基金，仲話就算要留喺內地嘅 job，佢一樣會接！總之要搵多啲錢，俾最好嘅個女。」思琦身邊人說。
出名慳家
出名圈中慳妹的楊思琦，獨力養家供樓兼養女，衣食住行，樣樣更加要就住使。
|
鍾意就快D Share啦！
|
|
|