探熱針
北京直擊 撇唔甩 Liddy 彭順主動除婚戒
彭順爆出背妻包養小三 Liddy（李悅彤），上月二十六日即飛大馬箍煲，並跟李心潔發表聯合聲明。與此同時，卻發生小三父親李德仁吞槍自殺，父女頓成新聞人物，家破人亡的 Liddy一直匿藏深圳，未有露面。
本週一（六月九日），彭順離開獨自去了沙巴散心的李心潔，由大馬經香港轉飛北京，為新戲作籌備，首度開腔承認獲妻子原諒外，一直被指跟小三未有斬纜的他，對 Liddy處處表現維護及擔心。
此外，去年戴住婚戒開工的彭順，如今已除低戒指，對跟李心潔的感情亦帶弦外之音：我諗好多嘢，唔係咁簡單。
Liddy爸爸好慘
週一（六月九日）黃昏，在香港赤鱲角機場等候轉機飛北京的彭順，雖然全程表現輕鬆，但無論記者如何重複提問，他都不肯正面回應跟 Liddy是否仍有聯絡。
壹：有冇搵 Liddy？
彭：呢個唔答。
壹：覺得佢爸爸件事好慘？
彭：呢件事真係好慘。
壹：之後有乜打算？
彭：冇乜心情，自己都未搞掂啲嘢。
壹：心潔會唔會去北京搵你？
彭：唔會喇！我今次去做嘢咋。
壹：做完嘢返大馬？
彭：應該係。
壹：會唔會同 Liddy搞清楚關係？
彭：其實都係呢啲情況，大家都明嘅。
壹：你曾經答應 Liddy會離婚，然後同佢一齊？
彭：你哋寫啫，唔提呢啲嘢。
壹：有冇同 Liddy聯繫？
彭：唔答呢啲嘢。
壹： Liddy爸爸嘅事，你清唔清楚？
彭：呢個真係唔清楚，真係好傷感。
壹：警方有冇搵你？
彭：冇喎，應該冇。
壹：會唔會返日出康城（有指彭順租了屋苑其中一個單位讓 Liddy一家人住）屋企？
彭：日出康城嗰個唔係我屋企，係佢屋企。
壹：出事之後，有冇影響工作情緒？
彭：盡量投入工作。
拍戲冇咁精彩
壹：是否覺得 Liddy爸爸件事好戲劇化？
彭：係好戲劇化，講真我自己拍嘅戲邊有咁精彩，我都冇試過咁多次頭條，呢個係自己人生嘅一幕。
壹：外父（李焯燊）話你唔可以有第三次？
彭：唉！我同你哋講，第一次（ Kama爆房）係流嘅，你哋都唔信喇？
壹：你同 Liddy去日本，係咪有咁嘅事？
彭：冇，邊個話我哋去日本，我而家講乜你都唔信。
壹：你個女知呢件事？
彭：知，有傾過。
壹：佢有冇表示？
彭：不過呢個唔講喇！希望大家幫嚇手，唔好牽涉細路仔。不過明白嘅，大家寫呢啲嘢出嚟，我做編劇，我都編呢啲古仔，但唔係想像中咁。
壹：經過呢件事，同李心潔感情更加穩固？
彭：我諗好多嘢，我覺得唔係咁簡單。
壹：會唔會交代？
彭：聲明交代咗喇。
壹：有傳你俾咗筆掟煲費 Liddy？
彭：我站喺編劇立場，都明你哋點樣編落去，但實際同編劇差好遠。
壹：有冇問過 Liddy爸爸件事？
彭：未呀，我反而好擔心，因為始終都係一個人嘅性命，呢個始終唔安樂。
等警方公布
壹：會唔會搵 Liddy？
彭：唔會喇，始終係佢私人空間。
壹： Liddy有冇搵你？
彭：冇。
壹：你有冇見過佢爸爸？
彭：冇。
壹：擔唔擔心係因為呢件事，令佢爸爸動殺機？
彭：而家都唔知，係等緊警方公布。
壹：警方有冇搵你？
彭：冇。
壹：暫時唔搵 Liddy？
彭：我自己都要匿埋先，唔好話搵佢。
壹： Liddy話同你之間係真感情！
彭：我唔答喇。
壹：之後會唔會搵佢？
彭：（冇回答）好喇，辛苦曬。
壹：究竟有冇俾分手費 Liddy？
彭：我都係編劇，好明白點解你哋要咁寫嘅。
壹：有冇 WhatsApp Liddy？
彭：佢應該心情好惡劣，大家應該明白，所以唔會騷擾佢，俾番啲私人時間佢。
心潔自責
抵達北京機場後，彭順再接受訪問，記者再問有關他跟 Liddy有否聯絡，他繼續迴避，只強調這件事之後，更能體會朋友及家人支持。
據了解，一直聲稱夫妻感情有變、今年初被 Liddy逼二揀一的彭順，當下已經除低婚戒，而有湖南人強悍及好勝特質的 Liddy，今次更要贏到底。
「佢份人好硬淨，同個外表係兩回事，平日有乜『𠵱鬱』，就話要同人攬炒。彭順今次都唔係玩玩嚇，呢個三角關係有排搞。」知情者說。
Liddy唔肯退，彭順未斬纜，最傷的李心潔反而自責。
「心潔話老公偷食自己都有責任，本來諗住一齊返香港，不過彭順要去做嘢，所以佢先去沙巴靜嚇，之後會再搵番老公。」李心潔身邊人透露。
|
鍾意就快D Share啦！
|
|
|
