探熱針
跳蜢騷 十年九唱 草蜢蔡一智最富貴
過去十年，只有 08年無開騷的草蜢，開得密，依然 keep到聲勢，全靠跳得招牌。今次跳住唱六場，最細的蔡一傑已經四十七歲，演唱會只有兩 part慢歌，全晚做跳蜢。
跳到扯曬氣，但開騷錢要三人分，做六場每人歌酬平均不足二百萬，搞到蘇志威要開舞蹈學校賺外快，蔡一傑唱足十年，除了靚衫靚車，磚頭都冇嚿；只有 06年娶得富貴周雪芳的蔡一智，同老婆持有兩個物業，市值 2,300萬，比較過癮！
絕無腳軟
大勢所趨，舊一輩歌手，愈唱愈有！當年由梅艷芳一手捧紅的草蜢，近十年不停開騷，比九十年代更有市場。
以跳舞做賣點，草蜢不得不比其他藝人更努力，三個中佬，開騷由頭跳到尾，絕無腳軟。
「其實年年開騷都有好處，因為咁，佢哋三個一直要 keep住做 gym練舞，阿細（蘇志威）開跳舞學校，跳舞已經係佢生活一部分，唔會等做騷先練舞；三個嘅體能都唔似四十幾歲！今次搵咗 Alan Mak排舞，難度較高，因為想有更高視覺效果！」演唱會一名製作人說。
三人均分
演唱會九成跳舞部分，三人跳到尾聲仍無氣喘，慢歌部分如《失樂園》、《 Lonely》，觀眾亦 high爆。「無諗過唱慢歌觀眾反應都咁澎湃，真係好感動！」蔡一傑說。
身為跳舞學校導師，蘇志威反而跳到成身傷。「隻手揩花曬，腳撞瘀咗亦唔知！都係其他人講，我先發覺。」
十年開九次演唱會，不停吸金，但蔡一傑名下至今屋仔都無間，蘇志威九六年買入西貢陶樂苑後，亦不曾再入市；而三子中，只得同有米老婆周雪芳持有兩個物業的蔡一智，最富貴。
「有段時間草蜢發展得唔係咁順利，直到師傅阿梅過身後，○五年開始做番演唱會，叫做長做長有，但佢哋唔似得其他獨立歌手，每次做騷歌酬要三個人均分，賺嘅都係有限數！」
唔加歌酬
密食當三番，但即使演唱會票價加，草蜢卻未有同步加
歌酬。
「草蜢好重視製作，就算貴，佢哋都要搵朱祖兒設計舞台同服裝，寧願大家收少啲，都要俾到製作觀眾睇，呢一點都係佢哋開極都得嘅原因！」
朱祖兒今次為草蜢設計的舞台因為有唔少凹凸面，又有傾斜部分，加上陰暗燈光，試過有舞蹈員在總彩排時跌落台。
「燈光打落個台會有陰影位，有時真係會睇唔到，個舞台唔平，打落去嘅光先至會好睇，所以大家都會好小心，盡量減少意外發生。」蔡一智說。
智嫂有眼光
草蜢三子每年靠開演唱會搵錢外，三人亦曾聯名買磚頭，先後買下九龍城格蘭大廈、屯門景峰徑等物業，賺近二百萬。
蔡一智○六年同周雪芳結婚後，眼見老婆投資眼光好，試過 00年買入的半島豪庭一賺 400萬佳績，財權下放，由老婆話事。至於蔡一傑 98年及 07年先後將手上物業甩手，賬面賺過八十八萬，至今再無揸磚頭。早年也曾瘋狂掃樓的蘇志威，現時僅持有飛鵝山陶樂苑，單位由負資產變成賺錢筍盤，守得雲開。
|
鍾意就快D Share啦！
|
|
|
