探熱針
《愛•回家》家變 蔣家旻 Bye咗 朱慧敏震走
高層下旨，上月宣布再再再添食至七百集的處境劇《愛．回家》，所有唔聽話、無表現的演員，通通無得留低。繼去年趙永洪離場，屬馬家骨幹成員的「馬子妮」蔣家旻，今個月初亦悄悄被叮走；至於一直不得人心、被指狂擦高層的朱慧敏亦難逃厄運，稍後劇情講律師樓人事變動大地震，她將會順勢被震走。
半年反省期
長壽處境劇《愛．回家》添食到六百集時，高層曾勵珍已下旨要革走三個眼中釘，包括多次與《愛》劇台前幕後炒大鑊的朱慧敏、心散的蔣家旻，以及經常擺款的湯洛雯。
本月初，飾演主場馬家乖乖女成員「馬子妮」的蔣家旻率先被「開刀」，為方便她「人間蒸發」，劇中跟港男李豪正熱戀的她，被安排放棄愛情出國進修。據知，高層以冷靜半年為懲罰，劇集接近大結局，才安排她回歸埋尾。
續約即出局
被逼「離家出走」，蔣家旻為此向朋友喊爆，馬家上下，亦替她比得罪人多的朱慧敏更早叮走而不值。
「蔣家旻上年話曬做咗部戲（《第一次不是你》）嘅女主角，諗住可以闖影圈，所以一直冇同無綫簽經理人約，後來俾公司氹簽約，點知簽咗無耐，就俾人踢出《愛．回家》。佢話接受唔到呢個事實，喊咗好耐。馬家班演員都好唔捨得，仲為佢搞咗個飯局，當安慰嚇佢。」一名劇組人員說。
至於由開劇拍到添食都堅持做「小炒王」的朱慧敏，上至導演下至助導，每隔幾日炒一鑊，仇家多到數唔曬！自己知自己事，有指她不時搵珍姐（曾勵珍）傾偈補飛，又同編審飲茶灌水，加送淚功扮慘，再做埋「金手指」篤湯洛雯，以求自保。
湯鎮業救命
擦還擦，近日盛傳珍姐決定順從「民意」，趁劇情講到「查李施」律師樓大地震，借勢震走朱慧敏。
「除咗朱慧敏，仲有律師樓裡面表現麻麻嘅人都會叮走。呢排係咁加戲俾朱慧敏，其實係想谷曬佢啲戲份，跟住話佢唔甘心屈喺間細律師行，同男友黎諾懿距離又愈嚟愈大，決定出國發展。送走佢之後，會安排其他人補位，好大機會係高海寧。」知情者說。
而恃住叔父是湯鎮業、跟高層珍姐有交情而擺款的新丁湯洛雯，監製一度打算煞停她與木偶哥林師傑及羅天宇的三角戀，不過湯鎮業答應返娘家幫拖，跟黃秋生接拍新劇，高層要睇湯鎮業台戲，令本來要起身的湯洛雯，暫時得救。
|
鍾意就快D Share啦！
|
|
|