抗癌司馬燕 又患腸炎今再入院
戰勝胃癌又腸炎 71磅司馬燕今再入院
【太古城】現年51歲的司馬燕自前年患上胃癌，康復後身體仍然孱弱不堪，體重由過去100磅跌到得71磅，骨瘦嶙峋。雖然抗癌成功，但畢竟這場大病引爆出不少後遺症，過去兩年病魔與她如影隨形，慶幸司馬燕每關都大步檻過，今年初才在體內駁上人工尿管，近日又腸抽筋發作，醫生估計是腸炎，她今日要再進院做檢查。
娛圈抗癌勇士司馬燕，前年年底不幸患胃癌，為保命割走整個胃，好景不常，大手術後帶來浪接浪的後遺症，病後一直接受化療的她，今年2月荷蘭旅行途中因腰患急返港求醫，發現其中一段尿管出現纖維增生致閉塞，需要駁上人工尿管，每隔三個月便要入院更換膠管，日前她又兩度腸炎，絞痛不堪，今日還要往養和做磁力共振檢查，司馬燕堅持正能量抗病魔。
近日有報道指臉容憔悴的司馬燕，由老公吳忠義（Togi Gouw）陪逛超市，有指司馬燕體重僅得60磅，情況令人擔心，記者昨日致電給她慰問，她說：「我最低時60磅啫，𠵱家有71磅，不過呢排因為腸抽筋，食咗嘢就絞痛，有時仲痛到去腰部，痛起嚟又冇胃口，睇落咪覺得我好似又瘦咗。」司馬燕自胃癌割胃後，食量暴減，她說：「有時食兩啖飯就飽，始終冇咗個胃，食物直接落腸加重負荷，有時會好多氣頂住就唔舒服，冇胃口。」
【昨晚最新圖片】
■司馬燕抗癌後，接二連三患病，體重僅剩71磅。
「冇嘢打得低我」
司馬燕明知胃口不好，每日惟有少吃多餐，她說：「早午晚三餐係正常，中間肚餓就食嚇生果、餅乾，盡量食多啲。呢排腸痛，我就食清淡肉碎粥，貪佢易入口易消化。」司馬燕日前已看腸胃專科醫生，並安排她今日入院做磁力共振，她說：「我嘅內臟大執過位，醫生懷疑我呢次係腸炎，要我入去照嚇，總之唔係癌症，冇嘢值得怕。」
打過胃癌這場仗，司馬燕身體變虛弱頻病，她從不怨天尤人，並樂觀積極面對：「最勁嘅胃癌都打唔低我，冇嘢打得低我，日日起身對我嚟講，都係新嘅一天，我覺得由胃癌後每日都賺咗，即使係咁病，但所有嘢對我嚟講只係少問題，我盡量都唔去諗，諗嚟都冇意思，唔係病死係嚇死。有啲嘢煮到嚟咪食，交畀醫生為我解決，我𠵱家冇負擔。」司馬燕現輕鬆過每一日，她說：「病痛交畀醫生，醫藥費由老公畀，我就只係食多啲，瞓多啲，我好幸運有親人、家人同朋友愛錫。」
■Togi對司馬燕不離不棄，夫妻間患難見真情。
■司馬燕與丈夫和友人邊行邊傾。
■愛妻號Togi對體弱老婆司馬燕照顧周到，昨晚齊往太古城晚飯。
■司馬燕非常感激Togi的照顧，令她可安心養病。
■司馬燕表示抗癌成功，丈夫和一對兒子的支持功不可沒。
昨晚攜夫食晚飯
胃癌雖讓司馬燕身體受折騰，但卻沒打敗她的意志，她說：「當然生存多一年梗係多一年好，日日都有意外發生。不過上天注定我未走，即使20樓跳樓都唔會死住。我係有呢個病，但對比好多人天生殘疾，我已算好幸福，我有時睇新聞見到好多年輕人自殺，我好心痛。」司馬燕慶幸丈夫和一對兒子的關愛，令她求生意志更強，無時無刻都有著正能量。司馬燕今日再入院，昨晚7時多她和老公Togi約同中年男子到太古城中心開餐，愛妻號的Togi與老婆十指緊扣，淡妝司馬燕精神不錯。
採訪：比華利
攝影：陳辰、吳耀輝
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp
|
鍾意就快D Share啦！
|
|
|