陸永早前不斷為《低俗講波團》宣傳，以為可以狂執騷，事實係執得雞碎咁多。
真面目
搵笨 《低俗講波》冇人睇 慳皮無綫 cut陸永騷錢
巴西世界盃本週去到尾聲。大台花 4億（連製作費）港元購入本屆世界盃轉播權自然不容有失。為賺到盡，今年大台仲抄考有線的「球彩台」，炮製《低俗講波團》於大台的收費台播出。請來盧覓雪、黃毓民、農夫及泰臣等孭飛主持，據知主持中，以盧覓雪和黃毓民身價最高，收 5千元一個騷（ 1騷約等於 1小時）。
之不過以大台作風，點會豪畀所有人？有人貴咗自然有人要平。據知農夫被要求「抵諗啲」以一騷價 3千元，講足 3場波、做足 10粒鐘。農夫當然睬你都傻，分組賽幾乎冇影，直到淘汰賽先現身，仲逐仲場波計，大台今次恰錯人。
大台今年播世界盃，於免費台播得 22場，被觀眾狂鬧孤寒。不過你有你鬧，大台縮數當然大把。今年大台學有線玩低俗講波，請來盧覓雪、黃毓民、農夫及泰臣做主持，又請成班冇人識的性感「世界妹」助興。表面好似好揼本，實則得個殼。
農夫唔肯「拍膊頭」
綜藝節目每 1小時計 1騷，今年世界盃分組賽期間，每晚 3場，由朝講到晚。由 11點開騷到第二朝 8點，計騷起碼 9個。如果跟足正確方法計，一班主持的薪金應該幾和味。盧覓雪、黃毓民兩個皇牌當然企硬唔減，收每騷 5千元。大台要慳，惟有向熟人農夫落手。知情者說：「佢兩個同無綫合作開，尤其陸永最近成日拍劇，咪想佢『拍膊頭』收順啲。佢同 C君各收$1,500做 3場。」
被迫做廉價勞工，農夫當然唔肯。原本陸永要為《流氓皇帝》到佛山取景，事前還度期做《低俗》，為免有期畀《低俗》，結果陸永同《流》劇組講自己可以攤長嚟做。到截稿前陸永只亮相了 3晚《低俗》，分別為 6月 27日、 7日 1日及 7月 5日，陸永更跟大台計足騷錢，唔接受「拍膊頭」建議。
有線幫補位
農夫扭計少現身，惟有靠有線幫陸浩明、衞志豪及莫家淦頂上。陸浩明向本刊證實被大台急召：「唔好話頂更，反正我都睇波，咪返嚟囉，會計番騷錢㗎……肯定唔只 1個騷。」至於農夫就透過經理人 Jonas回覆：「絕對唔係錢少問題，係因為陸永要去佛山拍《流氓皇帝》， C君要拍電影《 ATM提款機》啫。佢哋𠵱家得閒就上《低俗》其實冇限死要每日都做嘅。」被 cut騷，梗係唔同你每日都做
揸到盡
大台愛縮皮眾所周知，最經典係'10邵氏重拍《 72家租客》動用全台小生花旦拍攝，但酬勞只係利是一封內附「無言感激」 4字，同白做冇分別。
李思欣播 5日收 1千
大台不時出現嘅貸款廣告雜誌，據知就收足客戶廣告錢，但拍嘅演員只計騷錢，計法更是拍 1日只計 1個騷，好似李思欣約滿大台前，就係幫大台拍咗 1日呢個特輯收 1千元，但大台就分 5日播，老細賺到盡。
|
鍾意就快D Share啦！
|
|
|
