掃呢頁CODE去手機

2014年8月14日 星期四

[壹週刊 1275] 分手要狠 胡文新分手送股份 M1,




探熱針

分手要狠 胡文新分手送股份

合和太子爺胡文新自去年初跟美籍華裔歌手劉晨芝( Adrienne Lau)撻着後,兩個經常孖住睇騷兼夜蒲打得火熱,男方為討歡心,更使出銀彈攻勢,掟過百萬入股女友在中環蘭桂坊開設的夜場「 SHOW」,可惜戀情快來快去,胡文新好頭好尾,索性將夜店股份全部轉讓俾劉晨芝,徹底斬纜。

投其所好

胡文新與劉晨芝拍拖初期,女方搬到月租要五萬多元的深灣 9號千呎豪宅,跟男友住埋樓上樓下,方便日對夜對外,鬼妹仔性格的劉晨芝,更自爆會在家中煲定靚湯冧男友。

原本愛得痴纏,但最近卻傳出二人感情生變,劉晨芝不單只要四圍搵屋搬,避免與前度在屋苑內碰面,較早前掟過百萬入股舊愛投資的夜店「 SHOW」的胡文新,亦決定退出股東名單。

「其實『 SHOW』有幾個股東,舊年八月, Thomas(胡文新)為咗支持女友,投資咗幾百萬做咗『 SHOW』大股東,但真正落手落腳去搞盤生意,只有 Adrienne,晚晚落場打躉,做到凌晨收工,反而 Thomas就唔多出現,事關佢自己都大把大生意,又要周圍飛,當日 Thomas都係因為女友,先會投資夜場生意。」知情者說。

拍拖後,劉晨芝搬入深灣 9號豪宅,月租 5萬 2千。

去年 8月,胡文新跟劉晨芝孖住投資夜場「 SHOW」。

去年 5月,二人拍拖出席公開活動,不過只以「好朋友」相稱。

一了百了

既然感情有變,胡文新為了徹底斬纜,索性將手上的股份全數送給劉晨芝,一了百了。

「雖然冇咗有米男友撐腰,但 Adrienne係醒目女,佢幾年前由美國返香港,除咗做歌手,間唔中都會做顧問幫朋友搞夜場,蘭桂坊間 play可以咁旺,全靠 Adrienne度橋谷宣傳。佢又熟班韓國經理人,聽講嚟緊陸續會有韓星去『 SHOW』,搞旺個場。」知情者說。

對於分手後收前度股份,劉晨芝表現避忌說:「 SHOW嚟緊係有變動,不過因為牽涉其他股東,我唔方便透露。」至於跟胡文新的關係,她繼續死撐:「我從來都冇講過我哋拍拖,不嬲都係好朋友。」

開夜店外,劉晨芝跟莊思敏姊妹及巫翊鳴(右一)等夾份投資時裝店。早前慶祝 2周年,她更親自上陣,做 model行 show。

夜場常客劉晨芝, 12年跟一班圈中蒲友搞校服 P慶祝李詩韻(右二)生日。

周秀娜跟過氣城嫂葉熙祺都是 SHOW常客。

劉晨芝早前請韓國組合 4 MINUTE到 SHOW搞慶功,四女「貓晒」離開。

胡文新家族擁有的九龍灣展貿中心新擴建的電影院早前開幕,邀得財爺曾俊華及商務及經濟發展局局長蘇錦樑和馬逢國出席撐場。

分手有得「分」

圈中有些男星分手都會分部分資產給女方,甚至之後繼續供應舊愛的生活,算是有情義。

古天樂黃𨥈瑩

黃𨥈瑩是古天樂唯一公開承認的女友,二人於 1994年合演處境劇《餐餐有宋家》擦出愛火,雖然分手多年,但有指古天樂至今仍有供養她。

鄭伊健邵美琪

鄭伊健為梁詠琪而狠飛邵美琪,於心有愧的鄭伊健,把自己當時價值過千萬的物業轉到邵美琪名下,作為補償,後來該批物業升值至逾四千萬。

陳浩民佘詩曼

陳浩民和佘詩曼 02年合拍電影《飄忽男女》撻着,翌年阿佘以五百多萬購入北角海景台千二呎單位,有傳陳浩民有份出錢置業及供樓,分手後豪宅全歸阿佘。



鍾意就快D Share啦!