樂大媽手上一班愛將胡杏兒、吳卓羲、佘詩曼及黃宗澤，相繼在今年底及明年中約滿回復自由身。
探熱針
放生林峯 樂易玲鋪路過亞視
親生仔林峯竟然離巢，決定同十五年賓主關係的 TVB斬纜，難得大台肯輕易放人，事前無需雪藏之餘，仲可以拍重頭劇做告別作，絕對史無前例，全靠背後有樂大媽樂易玲做手腳，送林峯走。
據知，近年在大台失勢的樂易玲，一直有四圍搭路搵路走，以防 TVB逼她提早退休做藉口向她開刀，而一向與英皇關係密切的她，知道楊受成打算買亞視，即自薦拖馬過檔做揸 fit人，為鋪路過檔，近日樂大媽同藝人傾續約刻意放軟手腳，到適當時機，齊齊過亞視一家團聚。
明落 TVB面
林峯上星期突然高調亮相 Now台活動，並宣布同 TVB正式結束十五年合作關係，回復自由身。根據以往大台慣例，每逢有小生、花旦扭計拒續約，都會被放入雪櫃急凍一年半載，挫人氣再斷人米路，雙管齊下逼對方就範續約，但今次林峯不單有免雪金牌，仲可以拍重頭劇《使徒行者》做告別作，絕對史無前例。
「其實阿峯一直都冇諗過續約，樂小姐都知道佢去意已決，所以冇逼冇氹佢留低，但係就放風同其他高層講有轉機，只係爭少少條件就傾得掂，叫公司唔使雪，點知去到最後三個月，樂大媽先通知高層話傾唔掂，公司根本做唔到任何嘢，最多係將阿峯部告別作《使徒行者》，由台慶劇變番做普通檔期播，眼白白放生阿峯。」一名幕後工作人員說。
放軟手腳
樂易玲肯放走林峯，除了因為她一直視對方為親生仔外，另一個原因是樂易玲近幾年在 TVB失勢情況嚴重，風頭被死敵余詠珊完全蓋過，既然一山不能藏二虎，樂易玲開始搵定後路，更向關係密切的英皇探路，當知道英皇老闆楊受成有意用五億買起亞視，即使未成事，樂易玲已急不及待向楊受成自薦，更聲稱可以拖馬過檔。
據知，樂易玲多位 TVB愛將將於今年或明年中分別約滿，包括黃宗澤、胡杏兒、吳卓羲、郭羨妮同佘詩曼，由於全部未同 TVB傾續約，樂易玲隨時可以帶走班花旦小生過亞視。
「樂小姐近排傾約放軟晒手腳，以前佢好緊張，見到啲約仲有兩年，已經叫人返嚟傾，又鬧又氹軟硬兼施逼人留低，依家見到得番半年約先開始係咁意傾吓，如果對方要求加人工或者爭取更好條件，佢例牌話冇得加，冇得商量，變相等於叫人走，班一線小生花旦，樂小姐更加傾都冇傾過。」一名工作人員說。
|
鍾意就快D Share啦！
|
|
|
