杜汶澤翻生 開戲做麻雀王
立志食軟飯阿澤 翻生開戲忠於自己
杜汶澤早前在社交網站「口筆」擇言，招來內地封殺傳聞，過去兩個月幾乎絕迹社交平台，被網友指他要靠老婆田蕊妮養。接二連三負面新聞卻打不死阿澤，前日他已在怡保為電影《麻雀王》開工，阿澤昨揶揄無綫人工奀，田蕊妮未有能力讓他當軟飯王，阿澤只得繼續接戲，言語間暗示失去內地市場，雖損失錢財卻可忠於自己。
敢言杜汶澤今年3月因力撐台灣學生反服貿，強國網友發起封殺他北上賺人仔，即使阿澤有理還拖，但網友還是留言炸爆他的社交網站。隨着阿澤離港充電，風波終於告一段落，低調的行為卻被誤會沒工開，網友揶揄他要靠視后老婆田蕊妮孭起頭家。
據知阿澤的工作計劃早於半年前已訂好，經過兩個月休假，阿澤也要的起心肝剔除「懶根」，前日低調到馬來西亞怡保，與曾志偉、葉璇、盧海鵬、邵音音、王敏奕和新加坡笑匠李國煌等，為大馬電影公司投資約1,600萬港幣的笑片《麻雀王》開工，連日阿澤再活躍facebook，與網友分享開工趣事。
戲中阿澤跟李國煌是同門，拜曾志偉為師，但阿澤最終把麻雀王之位讓了給李國煌後，便退隱江湖，李國煌有見登寶座並非實至名歸，決意逼阿澤出山再戰高下，葉璇不屑阿澤讓出寶座，生下女兒王敏奕後便走佬。阿澤在戲中繼續放笑彈，該片以東南亞市場為主。
■身在大馬拍新片《麻雀王》的杜汶澤，與王敏奕搞笑扮大爺合照。
■葉璇（右）在電影中拋棄杜汶澤。
■杜汶澤大前日已飛大馬為新戲開工。
忠於自己唔會慚愧
阿澤在休息期間，傳出他冇得撈，要靠老婆田蕊妮撐頭家，阿澤在大馬開工正好闢謠，他昨在電話中自嘲：「我自細心願想食軟飯，三、四歲見大人返工搵錢就覺好辛苦，我養佢（田蕊妮）咁多年，佢係時候報答我，最慘係佢喺TVB份糧唔多，我真係唔捱得幾耐，我做嘢單純全為錢，夠使就唔做，要搵食先返工。」
雖然阿澤表示為錢返工，但藝人要面對排山倒海的負面新聞和流言蜚語都有一定壓力，問到可覺自己有打不死精神？他說：「做人成功失敗，唔係最重要，最重要係知失敗為乜嘢，如係因為票房唔好，自己工作唔好，觀眾唔睇你，你冇得撈係扺死，不過如果你係因為忠於自己個性問題，令事業上有阻滯，呢樣冇嘢值得羞恥。忠於自己唔值得慚愧，相反《低俗喜劇》票房得400萬、《3D豪情》冇戲院上，我就覺得淒涼，𠵱家係我態度差，但態度係我老母生成。」
下半年拍兩部電影
阿澤所言是否覺需要反省？他直認收入受負面新聞影響：「工作量唔可以同之前相比，係少咗合拍片同返內地工作，冇得拍《賭城風雲2》呢啲大片，但自己開心，有時睇你自己點睇逆境，做羞恥嘢令自己失敗先要難過，做值得驕傲嘅事就冇問題，我喺大馬拍戲都好開心。」阿澤表示下半年仍有兩部電影要拍，他說：「都係本土電影，可能有啲人覺冇得返大陸好慘，你有咁嘅價值觀我唔介意，但我至少做得開心，人人頭上一片天，冇話冇邊個唔得，生存好簡單，只要你肯做，喺大馬拍，喺香港拍都得，搵少啲咪搵少啲，最緊要忠於自己。」阿澤三次強調做人要忠於自己，不肯為五斗米折腰。
採訪：比華利
|
鍾意就快D Share啦！
|
|
|