【認戀西裝友】李詩韻當男友係結婚對象: 佢都幾叻仔，對我好好
2014-08-03 20:17:00
李詩韻被撞破同新男友拍拖發忟憎，不過好快佢就喺社交網站認咗呢段戀情。
李詩韻8月2號凌晨喺中環同西裝男蹺手拍拖斷正，搞到佢即場發忟憎，不過開心事又唔會嬲得耐，佢轉頭已喺社交平台自爆戀情。
今日李詩韻喺馬鞍山出席活動，被追問新戀情，佢對男友讚不絕口，笑笑口話：「我哋啱啱先開始，今次公開戀情真係好冒險，佢始終係圈外人，總之我男友喺美國創業，都幾叻仔，對我好好，就係講咁多」但係點都唔肯講到點樣識呢個男朋友，佢只係話：「總之好開心，咁公開唔係一件容易嘅事，我都係第一次公開，佢都唔係成日喺香港，希望大家畀多啲空間。」不過佢就好坦白承認會當對方為結婚對象：「有呢個潛質，都係有先會講。」
見佢同男朋友被影到當日，佢緊張到發忟憎，似乎好維護呢個男朋友，李詩韻話：「又冇話係維護邊個，身邊啲朋友都驚咗我，企喺我身邊嘅異性都會被人起底，我只係唔想再有呢啲事發生，希望大家唔好騷擾我另一半。o依家男友飛咗返美國，覺得異地戀都好好，唔駛成日喺香港面對啲壓力！」
李詩韻話現任男友喺美國創業，仲讚佢幾叻仔。
李詩韻fb
佢不諱言當新男友係結婚對象。
|
鍾意就快D Share啦！
|
|
|